Përmes një statusi në Facebook, deputeti i Partisë Demokratike, Oerd Bylykbashi ka komentuar vendimin e gjykatës ndaj ish-kryebashkiakut të Kavajës, Elvis Rroshi, që sipas tij ka rrëzuar një prej mekanizmave kryesorë të ligjit për dekriminalizimit: falsifikimin e formularit, që duhej të dënohej me burg.
“Kjo është një ftesë për kriminelët, që ligji i dekriminalizimit të mos i penalizojë e të ndihen të paprekshëm dhe të mbrojtur nga Rama”, shkruan ndër të tjera Bylykbashi.
Deputeti demokrat është shprehur edhe më i ashpër në lidhje me vettingun, duke shkuar deri aty sa ta quajë “banditing”.
“Në këtë Drejtësinë e Reformuar me mbikëqyrje nga ORMN (Ofiçina e Riparimit të Mjeteve të Ndërtimit), vettingu ka bërë që ikën gjyqtari që ka dhënë dënime me burg për kriminelë, por ai që ka ‘përdhunuar në komunitet’ dënohet me ‘punë në komunitet’, pra lihet i lirë. Fati i banditit dhe gjyqtarit bashkohen, ndahen dhe përcaktohen në psiqikën që nuk fal të Edi Ramës. Une nuk e kam lexuar, por nuk është çudi, që gjyqtarin ta ketë përmendur me emër te ‘Kurbani’. Një pyetje kam: nëse gjyqtari do të ishte parë në shoqërinë e Elvis Rroshit, siç qëndron Rama, a do të përbënte kusht skualifikimi në sytë e këtyre nëpunësve të vettingut? Po çfarë vetting thoni, ky është banditing!”.
a.ç
