Nëse deri dje drejtuesit e lartë politik në opozitë dhe në qeveri kanë bërë kujdes, që të paktën të mos dalin hapur se kontrollojnë sistemin e drejtësisë në vend, këtë herë kanë hequr çdo skrup dhe as po mundohen fare ta fshehin se duan një drejtësi politike. As më shumë dhe as më pak një kontroll thuajse të “pacipë” politik mbi drejtësinë parashikon edhe kërkesa e ish kryeministrit, Sali Berisha, në emër të PD-së për “vende të rezervura” në sistemin e drejtësisë.
Thënë thjeshtë fare, ish kryeministri Berisha kërkon që haptazi të fusë në darë politike dy organet më të larta të sistemit të drejtësisë, që janë Këshilli i Lartë i Gjyqësorit dhe Këshilli i Lartë i Prokurorisë. Këto dy trupa qeverisje të gjyqësorit do të përbëhen nga 11 anëtarë ku 6 anëtarë do të zgjidhen nga trupa gjyqësore, ndërsa 5 do të vijnë nga anëtarë jashtë gjyqësorit.
Kushti i Berishës, që dikton tashmë qartazi edhe votat e PD-së, është që 5 anëtarët e tjerë të vijnë nga jashtë Gjyqësorit si Avokatia, Profesorati dhe Shoqëria Civile me propozimin e partive. Por nuk mbaron këtu. Kulmi është që edhe kryetari i këtyre Këshillave të zgjidhet nga propozimet e bëra nga partitë politike. Kjo i vë vulën haptazi, se Berisha dhe PD po kërkojnë të kenë nën kontroll politik sistemin e drejtësisë, duke zhvlerësuar të gjithë investimin e bërë edhe nga bashkësia ndërkombëtare për Reformën në Drejtësi, që ajo të shkëputet nga duart e politikës.
Ajo që del qartazi është fakti se nëse miratohet kushti i Berishës për votat, atëhere të pestët që vijnë nga jashtë sistemit të drejtësisë, janë profesionistë që konvertohen në përfaqësues partish. Qartazi ata që do të përzgjidhen mbi këtë skemë që mund të jenë dhe profesionistë e të pavarur, me t’u vënë siglën e partive, do t’u shërbejnë atyre që i kanë propozuar dhe jo interesave të qytetareve. Mjafton të shikojmë KQZ për të kuptuar se çfarë “institucionesh të pavarura drejtësie” synojnë të krijojnë propozimet e Berishës.
(javanews.al) Me. Ar
