Gjykata e Posaçme ka hedhur poshtë kërkesën e të dënuarit me burgim të përjetshëm, Sokol Mjacaj, për lirimin nga regjimi 41bis. Mjacaj kishte paraqitur kërkesë për të dalë nga regjimi i posaçëm, ku ishte vendosur me urdhër të ministrit të Drejtësisë.
“Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtari Ardit Mustafaj, bazuar në nenet 471 dhe 480 të K.Pr.Penale dhe nenin 17, pika 9, të ligjit nr. 81/2020 “Për të drejtat dhe trajtimin e të dënuarve me burgim dhe të paraburgosurve”, me vendimin Nr. 26, datë 30.01.2025, vendosi: Rrëzimin e kërkesës së kërkuesit Sokol Mjaçaj me objekt kundërshtimin e vendimit nr. 619, datë 11.12.2024, të Ministrit të Drejtësisë “Për zgjatjen e periudhës së regjimit të posaçëm në instuticionin e ekzekutimit të vendimeve penale të sigurisë së lartë, për një afat 1 (një) vjeçar, për të burgosurin Sokol Mjacaj”.
Mjacaj është duke vuajtur një burgim të përjetshëm për vrasjen e dy turistëve çekë në vitin 2015. Në vitin 2023 ai ekzekutoi me armë zjarri brenda ambienteve të burgut të Peqinit Arben Lleshin.
