Nga Mero Baze
Shtetet e Bashkuara të Amerikës, u kanë kërkuar prokurorëve dhe gjyqtarëve shqiptarë, të marrin pjesë në formimin e Këshillit të Lartë të Prokurorisë (KLP) dhe Këshillit të Lartë të Gjykatave (KLGJ) që do të formohen këtë javë.
Formimi i këtyre dy institucioneve të larta, i jep fund vakuumit të krijimit të institucioneve në Reformën në Drejtësi dhe fut Shqipërinë në rrjedhën normale me mbushjen e boshllëkut në Gjykatën Kushtetuese dhe Gjykatën e Lartë, emërimin e Prokurorit të Përgjithshëm dhe atij Special.
Thirrja e SHBA-së vjen në një kohë, kur ka përpjekje të qarta për ta bllokuar këtë proces. Ndërsa KLP, e cila mblidhet nesër, mund ta përfundojë me sukses procesin, KLGJ rrezikon të bllokohet, pasi një shoqatë gjyqtarësh, nga ato që kanë qenë rreshtuar qysh në fillim kundër Reformës, po tentojnë ta padisin zgjedhjen e KLGJ në gjykatë, duke bllokuar kështu procesin.
Është kjo arsyeja që SHBA ka mbetur i vetmi aktor që po vëzhgon me shqetësim plotësimin e institucioneve në reformën në drejtësi, ndërkohë që qeveria është e angazhuar në ballafaqimin me protestën e studentëve, ndërsa opozita po tenton të ndezë disa vatra zjarresh, mbi të gjitha se po e shikon që krijimi i institucioneve të drejtësisë është drejt finishit.
Në një klimë të ngarkuar politike, kur zakonisht SHBA bën thirrje për të orientuar qytetarët amerikanë të rrinë larg apo afër tyre, sot është marrë me një shqetësim që duhet ta kishte klasa jonë politike, por bëjnë sikur e kanë mendjen tek protestat.
Në fakt, protesta reale e opozitës është pikërisht përpjekja tinzare për të bllokuar reformën përmes një shoqate gjyqtarësh. Kjo që ndodh në rrugë është zhurmë, për ta quajtur dhe atë reformë, dështim.
Përpjekja për ta dështuar Këshillin e Lartë të Gjykatave, është vendimtare për të mbajtur të bllokuar Gjykatën Kushtetuese, Gjykatën e Lartë dhe dështimin e procesit në vazhdim.
Ndaj ka shumë rëndësi pse Basha do të fusë hundët në çdo protestë. Zjarri në rrugë shpreson ta shpëtojë nga ajo që po ndodh me reformën, tani kur nuk e ka mendjen askush. Për fat të keq të tij, përveç SHBA.
