Në intervistën e tij për “Milori Live”, kryetari i bashkisë Erion Veliaj i rikthehet çështjes së ujit të pijshëm që diskutohet nga opozita. Veliaj, i cili kandidon për mandatin e tij të tretë, kujton një episod nga dita e tij e parë në bashki kur mori detyrën dhe iu desh të përdorte tualetin. Për habinë e tij, tualeti që përdoret nga personalitetet e rëndësishme shqiptare dhe botërore, funksiononte me një fuçi të madhe.
“Unë kam dy mandate kryetar bashkie por nuk kam për të harruar ditën e parë, është hera e parë që po e them në një studio këtë, ditën e parë në bashkinë e Tiranës, në katin e dytë ku hyjnë personalitetet, ka ardhur Princi i Monakos, kanë ardhur kryeminstra, presidentë, gjithë paria e botës që vjen, çelësi i kryeqytetit dhe ne mbarojmë atë ceremoninë e betimit dhe shkojmë në kat të dytë.
Unë, ti e di që unë jam tip sportiv, nuk vesh kollare e gjëra. Kulloja në djersë, aty Korrik a Gusht çfarë ishte ai betimi i parë, bëmë një pritje të vogël, kishin ardhur autoritetet fetare, gjithë çfarë ishin këta VIP-at e njerëzit e rëndësishëm të qytetit dhe duhet të shkonim në tualet. Te tualeti i katit të dytë pra ku shkon paria e Shqipërisë që vjen në bashki, aty gjej një fuçi të madhe, fuçi, fuçi gna ato të Alb Petrol-it, fuçi e çarë, fuçia me ujë, kishte një zorrë dhe njëri e thithte zorrën që të vazhdonte uji dhe të rrëshqiste në mënyrë konstante, pra të improvizonte një galixhan për një “alla turca” aty.
Ndërkohë kishte një skaldabanjë sipër dhe kushdo që vinte si personalitet, i jepej një top letre higjienike që ta merrte me vete, domethënë kjo ishte gjendja e ujit dhe e kanalizimeve në Tiranë. Pra në shtëpinë, se shtëpia e qytetit, e kryeqytetit të të gjithë shqiptarëve, e kryetarit të bashkisë që me demek përfaqëson kryeqytetin e gjithë shqiptarë, një i huaj… imagjino kur dëgjoj këta që japin mend për ujin, nuk e di a e ke dëgjuar, është njëri që ka marrë 300 vota, është Petrit Vasili, ka qenë nënkryetar bashkie ai, i këtyre bashkive. Jorida, Luli vetë, ky drejtori i rinisë që sot kandidon dhe imagjino, shkëmbeheshin në korridor dhe i jepnin njëri-tjetrit topin e letrës higjienike”, tha ai.
Veliaj për Ramën: Kemi një raport fantastik! Kush na ka inot, kshu na paftë përnot
Kryebashkiaku foli dhe për raportin e tij me kryeministrin Edi Rama. Veliaj e cilësoi një raport fantastik, duke shtuar se “kush na ka inot, kështu na paftë përnot”.
“Unë kam 20 vjet që flas e shkëmbej batuta me Edin, në këtë punë, jashtë kësaj pune, kur kemi qenë në vitet e vështira të opozitës. Batutat në fakt filluan që tek sheshi Skënderbej. Batuta mund të bëjnë njerëz që e mbajnë batutën. Ne nuk tregojmë racizëm me njëri tjetrin. Pra asnjëri nuk i thotë tjetrit ti je ezmer natyral, jo po këto…
Tjetër një parti që e ka fyerjen si një mënyrë për të komunikuar me tjetrin, tjetër gjë dy njerëz sportiv që punojnë fort, po sigurisht edhe dëfrehen fort. Dje kishim sigurisht pjesën solemne te sheshi Skënderbej dhe i them plako, kemi dhe këtë gjënë në Farkë, se e bëmë një çik shumë serioze aty, kështu nisi muhabeti.
Plus i thashë më duket se ka ngjit kjo kënga, edhe jemi bërë një grup njerëzish. A më na çmendet tha, do shkojmë në katund tha, unë nga katundi vij tha do më çosh në katund prap. Erdhi aty dhe…
Raporti me të është fantastik. Kështu që është ajo që të thashë, “kush na ka inot, kshu na paftë përnot““, tha Veliaj.
Nuk e kam as ambicie apo plan për të qenë kryetar i PS
Erion Veliaj ka deklaruar se nuk ka asnjë ambicie apo plan që të marrë drejtimin e Partisë Socialiste.
Ai theksoi ambicien e tij për bashkinë e Tiranës dhe për rezultate fituese në Vorë, Rrogozhinë, Kavajë e Kamëz.
“Nuk e kam as ambicie, nuk e kam as në planet e mia. Jam sot, drejtoj Tiranën, qarkun. Kemi një ambicie shumë të madhe jo vetëm për Tiranën si bashki, por edhe për Kamzën sidomos, Vorën, Rrogozhinën dhe Kavajën. Unë nuk jam delirant, unë e di që luftojmë në një territor komplet të vështirë për ne. Kamza ka qenë historikisht bashki e djathtë, Kavaja, historikisht, 20 vjet përpara se të rroiste Saliu ka qenë deputet aty.
Vora ka qenë, imagjino ndodhi Gërdeci e gjëra, e prap bashki e djathtë. Jemi në një situatë ku Vorën e fituam bindshëm më 6 Mars, jemi në një situatë ku fituam Rrogozhinën. Rrogozhina ka qenë gjithmonë 50 me 50. Jemi në një situatë ku kemi fituar Kavajën, kemi Kamzën prej asaj që ndodhi në 2019. Dhe ky është një shansi ynë i parë për ta marrë Kamzën me një betejë reale. Jam në mënyrë të kujdesshme optimist për një rezultat fitues në të 5-ta bashkitë, kështu që kjo është ambicia ime, nuk kam ambicie të tjera“, tha ai.
Ndërtesat e vjetra nuk do të shemben!
Kryetari i bashkisë Erion Veliaj ka mohuar shembjen e ndërtesave të vjetra 50-vjeçare. Ai u shpreh se deri më tani nuk ka një pasaportë për pallatet dhe secili prej tyre do ta ketë. Kjo do të thotë se nevojitet një analizë e ndërtesave për të ditur cilat janë problematikat në strukturën e tyre.
“Ligji thotë na duhet që të dimë, pra na duhet një check up i pallatit, ky ka mure mbajtëse apo lokali poshtë i ka nxjerrë dhe shyqyr i ka ruajtur Zoti? Pra këtu bëhet fjalë për të bërë një analizë të pallateve, sëidomos atyre të ndërtuar me punë vullnetare, 60-70 vjeç, për të ditur ku kemi nevojë për përforcime.
Në bazë të ndërhyrjeve diku do të duhet që të bëjmë përforcim, diku do të duhet që të bëjmë një mur mbajtës kur katet e paraa, lokalet, i kanë ndërruar, këtu bëhet fjalë për të ndihmuar njerëzit, për të bërë nder e jo qeder”, u shpreh Veliaj.
Veliaj solli si shembull rinovimin e një ndërtese në qendër të Tiranës ku sipas analizës, rezultoi që ishte i nevojshëm vetëm përforcimi i kolonave dhe pallati nuk u shemb. Kryebashkiaku theksoi se nuk ka asnjë ndërtesë në kryeqytet që duhet shembur.
“Së pari nuk kemi asnjë rast që duhet shembur, që ne nuk e kemi tashmë certifikuar tashmë për shembje prej tërmetit. Këtu bëhet fjalë për t’i paraprirë gjërave që do të vijnë“, vijoi ai.
