Çmimet e qirave po shtrenjtohen me ritëm të shpejtë, duke dhënë kontributin kryesor edhe në rritjen e inflacionit. Banka e Shqipërisë thotë se shkak është bërë kërkesa e lartë për banesa me qira. Vetëm në 2 muajit e parë të vitit qiratë u rritën me 8.5%.
Marrja e një banese me qira po kushton gjithnjë e më shumë në dy vitet e fundit. Banka e Shqipërisë thotë se çmimet e larta të qirave ishin edhe shkaku kryesor i rritjes së inflacionit gjatë vitit të kaluar.
Në raportin vjetor të bankës thuhet se inflacioni në 2025-ën ishte 2.6%, ku vetëm çmimet e qirave u rritën me 4.2%, shifra më e lartë e regjistruar ndonjëherë.
“Presionet rritëse mbi këto çmime erdhën nga rritja e kërkesës për banesa me qira dhe oferta e kufizuar për qira afatgjata, së bashku me stabilitetin më të madh të kursit të këmbimit dhe rritjen e çmimeve të banesave në vend”, thuhet në raport.
Për shkak të zhvillimit të turizmit, një pjesë e madhe e banesave që jepeshin me qira afatgjatë (mujore), tashmë janë kthyer në qira afatshkurtër. Pra qira ditore ose vetëm për disa ditë.
Kjo valë e shtrenjtimit të qirave të banesave nuk pritet të frenohet as këtë vit. Shifrat e bankës tregojnë se kontributi i kësaj kategorie në formimin e inflacionit për 2 muajit e parë të 2026-ën, ishte 1%, pra nëse inflacioni i kësaj periudhe ishte 2.4%, ndikimi i shtrenjtimit të qirave ishte 1%. Ndërkohë rritja e qirave në 2-mujor ishte 8.5%.
Ndikim në këtë shtrenjtim sipas ekspertëve të tregut po jep turizmi, që ka shtuar kërkesën për apartamente me qira, përmes platformave online Booking apo AirBnb.
Në raportin vjetor është analizuar edhe tregu i shitjes së pronave, ku theksohet se ‘përballueshmëria e blerjes së një banese’ po bëhet gjithnjë e më e rëndësishme për shkak të çmimeve të larta. Ndaj thotë Banka ndërhynë duke kufizuar kredinë për banesa për shkak të implikimeve që mund të vijnë nga ekspozimi i bankave në këtë sektor.
“Gjetjet paraprake sugjerojnë prani të shmangieve nga nivelet e qëndrueshme afatgjata, me implikime të mundshme për stabilitetin financiar të familjeve, sektorin bankar dhe për rritjen ekonomike. Këto evidenca mbështesin qasjen parandaluese të BSH-së për menaxhimin e ekspozimit të bankave ndaj tregut të pasurive të paluajtshme”, thuhet në raport.
Vetëm në gjashtëmujorin e parë të 2025-ës, çmimet e shitjes së banesave u rritën me 41.7%, ndaj edhe burimi kryesor i financimit mbetet kredia. Rreth 58% e pronave të shitura prej agjentëve u blenë me hua bankare, ku në pjesën dërrmuese kredia mbulonte 60% të vlerës.
