Veliaj prezanton 24 administratorët: Llogaria, e lartë sa pritshmëritë!
Kryetari i Bashkisë së Tiranës Erion Veliaj ka prezantuar sot 24 Administratorët e rinj me të cilët do të punojë gjatë mandatit të tij në krye të këtij institucioni.
Në fjalën e tij, Veliaj kërkoi nga ata punën dhe shërbimin maksimal ndaj qytetarëve, ose në të kundërt kontrata e tyre do të përfundojë. Veliaj theksoi se ai do të jetë personalisht në çdo orë në shërbim të qytetarëve dhe të njëjtën gjë dhe punë kërkoi edhe nga administratorët.
Po ashtu Veliaj u shpreh se gjatë detyrës, administratorët do të mbajnë në dorë vetëm flamujt e Bashkisë dhe të Shqipërisë. Në fund Veliaj tha se nëse puna e administratorëve do të kompromentohet, atëherë ata do të përgjigjen përpara ligjit.
“Ju emëroheni administratorë, pra nuk zgjidheni. Pra kontrata që lidhim sot nuk është e përhershme. Ajo do të jetë në bazë të performancës. Nuk do të jetë vetëm vlerësimi im, por edhe i qytetarëve. Tek unë do të gjeni një telefon, dhe një zyrë të hapur 24 orë në ditë. Nëse do të duhet ndërhyrja ime personale, konsiderojeni këtë një linjë të hapur komunikimi. Llogaria do të jetë aq e lartë sa pritshmëritë që kam. Nuk është sekret që sygjerimi për ju ka ardhur nga Partitë e koalicionit. Në administratën tuaj do të valëviten dy flamurë, ai i Shqipërisë dhe i Bashkisë. Nga ky moment harrojini flamujt e partisë. Ky është ekipi ynë unik që ka uniformën e bashkisë. Me të njëjtin dinjitet nisim nesër shërbimet. Detyra e parë është kjo që thashë tani. Nëse një qytetar largohet i pakënaqur është shenja e parë se diçka nuk po funksionon. Veproni sipas parimit: Beso, kontrollo. Por nëse kompromentoni punën dera ime nuk do të jetë e hapur.” theksoi Veliaj
