Kryetari i “Plisave” tregon pse i sulmuan polakët
Udhëheqësi i “Plisave”, Albert Kastrati i njohur si “Tigri” ka thënë se tifozët polak të Legia Varshavës i kanë provokuar ata, prandaj janë ballafaquar mbrëmë në Tiranë para ndeshjes ndërmjet Kukësit dhe Legias në kuadër të Ligës së Evropës.
Sipas tij, “Plisat” nuk janë përgjegjës për atë që ka ndodhur më pas në stadium gjatë lojës dhe pas saj. Kastrati ka thënë se ata nuk kanë qenë fare as në stadium.
“Thjesht ata kanë provokuar. I kanë shqetësuar njerëzit nëpër Tiranë, ua kanë derdh kamerierëve birrat në fytyrë”, ka thënë Kastrati.
Tutje ai ka thënë se janë po këta tifozë që në çdo ndeshje bëjnë thirrje kundër Kosovës e po ashtu organizojnë protesta kundër njohjes së Kosovës nga Polonia.
Ndeshja e mbrëmshme ndërmjet Kukësit dhe Legias u ndërpre në minutën e 60-të, pasi që një futbollist polak u godit me një mjet të fortë, shkruan Indeks. Shefi për siguri në UEFA në konsulta me delegatin dhe gjyqtarin e ndeshjes, ka vendosur që ndeshja mes Kukësit dhe Legias të mos vazhdohet.
