Një delegacion me anëtarë nga Parlamenti dhe qeveria japoneze, i kryesuar nga Takaaki Katsumata, kryetar i Komisionit për Punët e Jashtme në Dhomën e Përfaqësuesve, u prit në takim nga kryetari i Bashkisë së Tiranës, Erion Veliaj, i cili vlerësoi marrëdhënien e veçantë mes dy vendeve.
“Dua që, këtë marrëdhënie të veçantë që kemi mes shteteve dhe qyteteve tona, Tiranës dhe Tokios, ta kthejmë në një marrëdhënie të veçantë edhe mes njerëzve tanë; mes njerëzve që bëjnë biznes, mes njerëzve të akademisë, dhe mes bashkive tona të niveleve të ndryshme”, tha Veliaj.
Kryebashkiaku vlerësoi Komunitetin shqiptaro-japonez ne Tokio si një faktor kyç në forcimin e maredhenieve dhe ftoi kompanitë japoneze për të investuar në fushën e teknologjisë.
“Folëm për Zonën e Lirë Ekonomike, ku do të ishim të lumtur të kishim shumë kompani nga Japonia, për të investuar sidomos në fushën e teknologjisë, aty ku ne po investojmë shumicën e financave tona, me kurse për fëmijët që mësojnë kodim, robotikë, dhe shumë tema të ngjashme, me të cilat edhe ekonomia japoneze është bërë sot titullare në botë. Nuk ka shprehje më të bukur se sa ta përkthejmë suksesin tonë në ca gjëra që bëjmë ne, që ndoshta ju nuk i bëni dot; në ca gjëra që ju i bëni, që ne nuk i bëjmë dot. Por, të dy bashkë mund të bëjmë gjëra të mrekullueshme”, tha Veliaj.
Po ashtu Veliaj nderoi me “Çelësin e Tiranës”, kreun e Komitetit të Miqësisë Shqiptaro-Japoneze, Minoru Kiuchi.
/a.r
