Radio BBC i akordoi një minutazh të plotë sot në mëngjes fitores së Shqipërisë në Euro 2016 ndaj Rumanisë. Komentatorët vunë në dukje se ky është suksesi iparë historik i një vendi të vogël, në këtë turne të madh. Sipas tyre, skuadra shqiptare pret tani shanset që do t’i dalin gjatë rrugës, nga ndeshjet vijuese, për të kaluar turin pasardhës të kampionatit Europian dhe për të luajtur ose me Anglinë, ose me Gjermaninë.
BBC u lidh me telefon me kreun e bashkisë së Tiranës Erion Veliaj, për të komentuar valën e entusiazmit që ka ngjallur në Tiranë ky sukses i Kombëtares. Veliaj tha për BBC se “gjithkush në kryeqytet është zgjuar sot i gëzuar nga fitorja e ekipit kombëtar. Ka kohë që s’kemi qëne kaq të lumtur, ishte një moment fantastik”. I pyetur sesi erdhi kjo fitore, Veliaj u përgjigj se për shumë kohë Shqipëria ishte konsideruar si një vend i prapambetur në sport, ekonomi, politikë etj. “Kemi bërë një rrugë të gjatë, kemi qenë për shumë kohë prapa të tjerëve. Sot meqë është dita ndërkombëtare e refugjatëve, duhet të them se shumë nga djemtë që luajnë sot për ekipin kombëtar kanë qenë fëmijë refugjatësh. Kanë shkuar për punë në Greqi, Itali dhe vende të tjera, duke bërë gjithfarë punësh. Mendoj se këto histori suksesi janë një metaforë e madhe se çfarë mund të arrijnë njerëz që mblidhen dhe luftojnë për një synim të vetëm”.
“Europa dhe europianët rriten duke qëndruar së bashku. Rezultati i ekipit tonë konfirmon këtë”, shtoi kryetari i bashkisë së Tiranës për BBC.
