Bashkia e Tiranës i jep zgjidhje problemit të furnizimit me ujë të pijshëm për banorët e Shkozës, të cilët prej më shumë se 20 vitesh vuanin nga mungesa e ujit dhe detyroheshin të furnizoheshin me bote. Me investimin e ndërmarrjes Ujësjellës-Kanalizime Tiranë në këtë zonë bëhet e mundur që 1500 banorë të Njësisë Administrative nr. 1 të furnizohen me ujë nëpërmjet rrjetit të ri. Gjatë inspektimit të punimeve për zgjidhjen e problematikës së krijuar prej vitesh në këtë zonë, kryetari i Bashkisë së Tiranës, Erion Veliaj, tha se po investohet në çdo cep të qytetit.
“Kemi vendosur që në këtë zonë, të cilën e përfshin njësia 1 dhe është zhvilluar kryesisht pas viteve ’90, të investojmë në rrjetin kryesor të ujësjellësit që lidhet direkt me depon e ujit, për t’u siguruar që shtojmë ujin e pijshëm, në mënyrë që banorët të mos e blejnë me bot, por edhe të ndalim ndërhyrjet në rrjet”, u shpreh Veliaj. Ai shtoi se fillimisht UKT-ja po shtron rrjetin e ujit, mandej rruga do të shtrohet me asfalt dhe do të bëhet rehabilitimi urban i zonës. Sipas tij, ky koordinim midis kompanive publike bëhet për të shmangur çdo humbje në investimet e bashkisë, ndryshe nga sa veprohej më parë kur rrugët pasi asfaltoheshin çaheshin edhe njëherë nga ujësjellësi.
Kryebashkiaku i Tiranës tha se krahas ndërtimit të infrastrukturës, po investohet edhe në kulturë. “Me infrastrukturë krijojmë kushtet që të ketë ujë të bollshëm në lagje dhe me kulturë sigurohemi që njerëzit ta paguajnë atë. Sigurohemi që qytetarët të marrin cilësi në shërbim, por edhe pa u prishur punë qytetarëve të tjerë duke ua vjedhur ujin me lavazhe apo me vaditjen e arave, e rrjedhimisht lënë pa ujë gjysmën e Tiranës”, theksoi Veliaj. Ai shtoi se nëse çmimin e ujit publik krahasohet me ujin që shitet me bote, qytetarëve u bie më lirë të jenë në rregull me shtetin se sa ta blejnë ujin me bote apo duke ndërhyrë në mënyra të paligjshme në rrjet, çka mund të të çojë edhe përpara drejtësisë. “Por, sigurisht që nuk ke të njëjtën cilësi nëse ujin e merr me bote, madje është edhe joetike, sepse duke vjedhur ujin nga rrjeti i bën dëm fqinjit tënd, kushëririt tënd, familjarit tënd disa metra më tutje”, tha Veliaj.
Nga investimet e fundit të UKT-së për shtrimin e linjave të reja dhe aksionet për eliminimin e humbjeve në rrjet, banorët e Tiranës kanë pasur më shumë furnizim me ujë krahasuar me të njëjtat periudha të viteve të kaluara. “Lajmi i mirë është që uji në Tiranë, edhe pse ky është një sezon i vështirë, me një thatësirë të jashtëzakonshme, është në dyfishin që ka qenë në një verë më përpara, por prapë nuk mjafton. Që t’ia arrijmë atij standardi dhe atij misioni që kemi vendosur për veten tonë, që të kemi ujë 24 orë, do të duhet që çdo zonë, atje ku ka një rrjet të mbyllur, të jetë korrekte dhe pastaj atë korrektesë të pagesës së faturës së ujit ne ta përkthejmë menjëherë në investime”, vijoi Veliaj.
Kryetari i Bashkisë së Tiranës paralajmëron nisjen e një sërë investimesh në ujësjellës-kanalizime që do të përmirësojnë furnizimin me ujë të qytetarëve. “Besoj se ky vit do të hyjë në histori si viti më radikal i ndërhyrjeve dhe i financimeve në ujësjellës dhe kjo në fakt u kushtohet jo punëtorëve të ujësjellësit, por qytetarëve të Tiranës. Korrektesa e tyre këtë vit në pagesën e ujit të pijshëm është përkthyer në një korrektesë dhe në një impenjim maksimal nga ujësjellës-kanalizimet e Tiranës për t’i çuar këto në investime”, theksoi Veliaj. Ai u ka kërkuar qytetarëve që të mos e shpërdorojnë ujin e pijshëm dhe ta trajtojnë atë si një mall të çmuar. “U bëj thirrje qytetarëve, vazhdoni të jeni korrektë me ujësjellësin, vazhdoni të kurseni ujë se është një mall dhe si çdo mall ka një fund dhe ne do t’i përgjigjemi me të njëjtën monedhë, me investime dhe me infrastrukturë të dobishme për këtë komunitet”, deklaroi Veliaj.
Drejtori i Përgjithshëm i UKT-së, Redi Molla, tha se më në fund i jepet zgjidhje problemeve të krijuara me furnizimin me ujë në rrugën ”Spahiu” në zonën e Shkozës, të cilët furnizoheshin deri tani me bote dhe puse. “Po shtrojmë linjë shpërndarje dhe furnizimi të ri të ujësjellësit. Përmes këtij investimi furnizohen mbi 1500 banorë, rreth 300 familje. Do të bëhet edhe azhornimi i zonës me kontrata të reja për furnizimin me ujë. Është rreth 2 mijë metra linear ujësjellës shpërndarje dhe rreth 1 mijë metra linear linjë transmetimi, totalisht e re dhe që zgjidh njëherë e përgjithmonë problemin e ujit”, deklaroi Redi Molla.
Falë investimeve të Bashkisë së Tiranës dhe ndërhyrjeve që ka bërë në disa prej linjave të furnizimit me ujë, ka shmangur abuzimet me ujë dhe ka sjellë një furnizim më të madh për familjet në krahasim me vitet e shkuara. Paralelisht me këtë aksion, UKT dhe Bashkia e Tiranës ka nisur një aksion për ndërgjegjësimin e qytetarëve mbi përdorimin e ujit të pijshëm dhe ka ndërhyrë në disa subjekte private si lavazhe apo ferma që e keqpërdorin këtë mall.
