Ajo që deri para dy vitesh dukej e pamundur, sot është realitet. Projekti për rehabilitimin e Bregut të Lumit është drejt fundit, ndërsa qytetarët e zonës i kanë shpëtuar përmbytjeve që pësonin thuajse pas çdo shiu. Bashkia e Tiranës ka përfunduar ndërtimin e skarpateve dhe pritave në gjatësinë prej 8 kilometrash të Lumit të Tiranës, ndërsa ka nisur edhe gjelbërimin dhe pyllëzimin e sipërfaqes anësore të tij. Kreu i Bashkisë së Tiranës, Erion Veliaj inspektoi punimet e realizuara deri më tani dhe mori pjesë në aksionin e mbjelljes së pemëve dhe shkurreve, si pjesë edhe e projektit të Pyllit Orbital.
Veliaj u shpreh i kënaqur për ecurinë e punimeve dhe shtoi se falë këtij projekti, Bregu i Lumit nuk konsiderohet më një zonë e degraduar dhe e pistë, që përmbytej çdo vit. “Jo vetëm që s’patëm përmbytje në zonën e Bregut të Lumit, jo vetëm që uji nuk kaloi as brezin e parë të mbrojtjes, por jemi sot në një situatë ku po bëjmë diçka që para dy vitesh konsiderohej luks. Të ndërtonim një park buzë lumit, të mbillnim 4000 pemë, 40 mijë shkurre dekorative, të bënim pistat e vrapit te Bregu i Lumit. Për të gjitha këto, dy vite më parë dikush do na quante të çmendur. Por, me sa duket çmenduria ose mrekullia ndodhi; sot jo vetëm kemi përfunduar sistemimin e lumit, lumi është në shtrat, kanalet e ujërave të zeza shkojnë në kolektorë dhe nuk hidhen më në lumë”, tha kryebashkiaku i Tiranës.
Ai u shpreh se falë investimeve të Bashkisë së Tiranës në gjithë këtë zonë, është rritur vlera e pronës, ndërsa banorët e saj do të kenë shumë pranë një minipark për çlodhje dhe aktivitete të ndryshme sportive. “Lumi ka sjellë jo shkatërrim, por civilizim; sot ta kesh shtëpinë pranë lumit të Tiranës do të thotë ta kesh shtëpinë pranë një parku, pranë pistave të biçikletave dhe korsive të vrapit. Pylli Orbital në zonën jugore, që ndjek unazën, dhe në zonën veriore, që ndjek lumin, besoj se është një ndër gjërat më të mira që kemi bërë”, shtoi Veliaj.
Kryebashkiaku tha se ky është investimi më i mirë për brezat e ardhshëm, ndërsa 2017 do mbahet mend si viti që shmangu përmbytjet në zonën e Bregut të Lumit. “Sigurisht, pemët sot janë filiza, ndoshta nuk kanë duk, ndoshta nuk do kenë duk edhe kur ta mbarojmë këtë punë, por jam i sigurt se do kenë duk për brezat e ardhshëm, kur të shohin një lum i cili është sistemuar, është në shtratin e vet, që mbron banesat, me një hapësirë argëtuese e çlodhëse; do ketë duk për një gjeneratë tjetër, pas kohës sonë, që do të kujtojë se në 2017 jo vetëm shpëtuam Tiranën nga përmbytjet dhe nga një havale e disa viteve me radhë, por i dhamë kësaj zone një nga vlerësimet më të mëdha të pronës dhe cilësisë së jetës në njësinë 11, njësinë 9, 8 dhe 4”, tha Veliaj.
Gjithashtu, kreu i bashkisë bëri të ditur se aksioni i mbjelljeve do të vazhdojë edhe në të gjitha ditët e festave të fundvitit, deri në pranverë, për t’u siguruar që brenda këtij sezoni mbjelljesh do të thyejmë rekordin e mbjelljeve të vitit të shkuar. “Më vjen mirë që po shfrytëzojmë edhe ditët e fundit të vitit për këtë revolucion të gjelbër për Tiranën. Do të vazhdojmë fuqimisht edhe në fillim të vitit të ri me projektin e Pyllit Orbital, si në veri, edhe në jug. Ajo që po bëjmë është që po gjelbërojmë segmente të caktuara të pyllit orbital dhe jam i sigurt se brenda dy mandateve të ardhshme, do të kemi të gjithë konturin e pyllit orbital, tashmë të shënjestruar si një mushkëri oksigjeni për Tiranën”, u shpreh Veliaj.
Ai u bëri thirrje banorëve që në këto ditë festash të tregohen të kujdesshëm dhe të ruajnë ambientin pastër. “Dua të ftoj të gjithë qytetarët, është stina e Vitit të Ri. Sigurisht, ka shumë konsum, le të tregohemi të kujdesshëm! Fakti që ka shumë konsum dhe përdoret shumë ambalazh, nuk është një arsye për të “pushtuar” Tiranën me plehra. Jemi sot qyteti më i pastër në Shqipëri, ndër më të pastrit kryeqytete në rajon, por e mira s’ka fund, ndaj po të tregojmë pak kujdes edhe me mënyrën se si konsumojmë dhe largojmë mbetjet nga konsumi i festave, do ta vlerësoja shumë nga të gjithë”, tha kryebashkiaku. /ma.me
