Kryetari i bashkisë së Tiranës, Erion Veliaj në një prononcim për mediat sqaroi opinionin publik në lidhje me masat e marra nga Bashkia, për shmangien e përmbytjeve dhe furnizimin me ujë të pijshëm 24 orë.
“Gjatë gjithë ditës së djeshme, ne kemi pasur vetëm në QSUT 21 bote që kanë furnizuar, çdo orë ka pasur një furnizim me 10 mijë litra ujë, ndaj në asnjë moment nuk është ndërprerë furnizimi në situatat jetike. E di që situata do të përkeqësohet sërish sot në darkë, por sidomos nesër, sërish parashikohet shi. I gjithë stafi ynë është në terren. U bëj thirrje qytetarëve që të na ndihmojnë, ndihma më e madhe që mund të japin është të mos hedhin qese dhe shishe plastike nëpër kanalizime. Vetëm dje kemi hequr sërish 50 tonë qese nga kanalizimet e Tiranës”, nëvizoi Veliaj.
Më tej, ai sqaroi se ditën e sotme po vijohet në menaxhimin e situatës. “Sot po vijojmë me aksionin, disa prishje të tjera, edhe në zonën e Selitës, Laprakës, Don Bosko, njësia 4, te Bregu i Lumit. Ne jemi duke menaxhuar, e në fakt kemi evakuar edhe 63 persona në një zonë të Bashkisë Kamëz. Unë e kuptoj se këtu politizohet gjithçka, por ata që e politizojnë t’i dalin njëherë për zot bashkive të tyre e më pas të na kërkojnë llogari si ne menaxhojmë qytetarët e bashkive të tyre në Tiranë”, u shpreh Veliaj.
Nga ana e tij, nënkryetari i bashkisë, Arbian Mazniku, tha se “sipas parashikimeve të motit, gjatë mbrëmjes së sotme po edhe gjatë ditës së nesërme do të ketë sërish reshje shumë të mëdha, jo të zakonshme për periudhën, më të mëdha se pritshmëria, pas një periudhe të gjatë thatësire. Por, edhe si rrjedhojë e një problemi të trashëguar prej shumë kohësh, ku siç mund të shihni vetë kanalizimet e ujëmbledhësit nga rrugët nuk janë pastruar prej shumë vitesh. Pastrimet mund të minimizojnë një pjesë të madhe, ne kemi nisur prej dy muajsh dhe do të vijojmë, por do jetë një proces që do të kërkojë një vit, për të rikuperuar gjithë kohën e punës që nuk është bërë në katër vite.
