Në një konferencë për shtyp nga ambientet e Bashkisë Tiranë, Erion Veliaj i është përgjigjur sot presidentit Nishani. Kryebashkiaku e cilësoi Bujar Nishanin si një armik të lojërave për fëmijë, ndërsa tha se ai doli të enjten para mediave vetëm për interesin e tij personal.
“Nishani nuk mbron interesat kombëtare. Ai nuk është një president unifikues, por përçarës. Është një president i dështuar, i cili po e lë me turp detyrën e tij” – tha Veliaj.
Ai ngriti pyetjen, të cilës sipas tij, Nishani nuk iu përgjigj.
“Çfarë mendon presidenti për ndërtimin e 17-katëshit?” – tha Veliaj.
Gjatë fjalës së tij, Kreu i Bashkisë Tiranë deklaroi se ‘Gener2’ është pajisur me leje nga Basha pavarësisht se moratoriumi i ndërtimeve kishte hyrë në fuqi dhe Komiteti i Digave nuk ia kishte aprovuar ndërtimin te liqeni.
Veliaj shtoi se “Sali Berisha thirri nën armë të gjithë ushtarët e tij kundër Bashkisë dhe ushtari më i bindur ishte Presidenti i Republikës. Ai e ka shndërruar Presidencën në një zyrë shtypi të Partisë Demokratike”. (javaneës.al / d.i)
