Ngritja e tregjeve për produktet e fshatit, integrimi dhe investimi në rrjetin rrugor dhe ngritja e Qendrës së Agronomisë dhe Veterinarisë, janë disa nga projektet që kandidati i koalicionit të majtë për Bashkinë e Tiranës, Erion Veliaj, ka në programin e tij për administrimin dhe zhvillimin e zonave rurale. Në dëgjesën e sotme me banorët e Kasharit, i shoqëruar edhe nga deputeti i PS, Artan Gaçi, Veliaj prezantoi disa nga pikat e programit të tij për fshatin dhe theksoi nevojën e krijimit të katër tregjeve në të gjitha pikat hyrëse të Tiranës.
“Është i nevojshëm një treg i ri në zonën e Kasharit, një tjetër në Kombinat, që mbulon hapësirën e Vaqarrit dhe Ndroqit, një treg në Sauk për fshatrat si Petrela, Krraba, Baldushku, Bërzhita dhe një tjetër në Kinostudio, për të mbuluar zonën nga Zallbastari, Dajti, Zall-Herri e me radhë”, sqaroi Veliaj. Sipas tij, çmimet e larta në tregje vijnë për shkak të monopolit. “Është e rëndësishme të kemi këto katër tregje, për të thyer monopolin. Këtë duam të ndryshojmë”, theksoi ai.
Shqetësimit të banorëve për çështjet e infrastrukturës bujqësore, në vaditje dhe kullim, kandidati socialist tha se me krijimin e bashkisë së re do të merren disa kompetenca nga qeveria qendrore. Ai u shpreh se Ministria e Bujqësisë nuk mund t’i shërbejë të gjithë fermerëve për shërbimet e veterinarisë dhe të agronomisë. “Në momentin që Bashkia merr dy shërbime të reja, do të ngrihet Qendra e Agronomisë dhe Veterinarisë, por edhe shërbimet e tjera, siç janë Bordi i Kullimit. Zgjidhja më e mirë është që sa më shumë shërbime të tilla të kalojnë në nivel bashkie”, shpjegoi Veliaj.
Duke folur për zgjedhjet e 21 qershorit, Veliaj tha se në tavolinën e tyre të bukës njerëzit nuk diskutojnë se si të rrëzojnë qeverinë apo se si të bllokojnë reformën e pensioneve, por për çerdhet, kopshtet, shkollat ku duan të çojnë fëmijët e tyre, pse nuk u është shtruar rruga te porta e shtëpisë, pse nuk ka ndriçim apo pse nuk janë mbledhur plehrat. “Këto janë problemet reale të familjeve tona. Ne e refuzojmë lojën e kundërshtarit. Ata nuk dinë të kërkojnë ndjesë për 4 vitet që Tirana u kthyer në kryeqytetin më të pistë në Europë. Në vend të ndjesës, ata tregojnë barsaleta”, deklaroi Veliaj. Duke e vlerësuar si tepër serioze gjendjen në të cilën ndodhet Tirana sot, Veliaj tha se “do të fitojmë bindshëm në Tiranë e kudo, për ta çuar kryeqytetin në drejtimin e duhur. Ata merren me familjet tona, ne punojmë për familjet e tona”.
Ai kritikoi mënyrën e drejtimit të bashkisë më të madhe në vend, duke theksuar se janë ata që shkatërruan Shqipërinë që duan të marrin Bashkinë e Tiranës. “Këta thonë: na jepni edhe 4 vite të tjera se ujku qimen e ndërron dhe zakonin e harron. Jo! Këta nuk e harrojnë zakonin. Janë të njëjtët ujqër që i kemi parë 8 vjet në qeveri dhe 4 vjet në Bashki. Këta janë i njëjti ekip që e shkatërroi Shqipërinë dhe ekipi që e shkatërroi Shqipërinë nuk mund të jetë ekipi që mund të rregullojë Tiranën”, deklaroi Veliaj.
Sipas tij, çdo njeri duhet të gjykohet nga puna që ka bërë më parë. “Edhe Lulzim Basha duhet të gjykohet për punën që ka bërë si kryetar bashkie. A është ky kryetari i bashkisë që duam: 29 ditë në parti dhe 1 ditë në bashki? Jo! Tiranës i duhet një kryetar bashkie me kohë të plotë”, tha Veliaj. “Si qenka sukses kur i merr pacientët nga spitali shtetëror dhe u thua se janë prishur aparaturat në spital, ndaj shko te klinika private? Kjo do të ishte njësoj sikur unë që bëra reformën e pensioneve të kisha krijuar një fond pensionesh private, ta kisha venë me detyrim në ligj që njerëzit të paguanin pensionin në privat”, tha Veliaj.
Një shqetësim i banorëve ishte dhe problemi i ujit të pijshëm. Duke sjellë në vëmendje se në Ujësjellës – Kanalizime punojnë 1800 veta, kandidati socialist tha se shumica e tyre angazhohen nëpër mitingje. “Në të gjithë takimet e tyre është një ekip me punonjës nga ujësjellës-kanalizime, të Policisë Bashkiake, të pastrimit, që shkojnë kudo dhe sillen sikur janë qytetarë që i takojnë rastësisht”, u shpreh ai.
Ndërkaq, në fjalën e tij deputeti i PS, Artan Gaçi, e vlerësoi kandidatin Veliaj si ministrin më të suksesshëm të qeverisë Rama. Sipas tij, Veliaj e mori Ministrinë e Mirëqenies Sociale dhe Rinisë nga ministria ku bëheshin qoka elektorale dhe e ktheu ministrinë më të rëndësishme
