Qeveria meksikane thotë se dy agjentët amerikanë që humbën jetën fundjavën e kaluar në një aksident automobilistik nuk ishin të autorizuar të operonin në vend.
Zyrtarët, të cilët raportohet se punonin për CIA, kishin marrë pjesë në një operacion kundër laboratorëve të dyshuar të drogës në shtetin verior të Chihuahua, përpara se automjeti i tyre të rrëshqiste nga një rrugë malore dhe të shpërthente.
Pas një hetimi të urdhëruar nga presidentja Claudia Sheinbaum, ministria e sigurisë në Meksikë tha se “asnjëri prej tyre nuk kishte akreditim formal për të marrë pjesë në aktivitete operacionale” dhe se autoritetet federale nuk ishin informuar për praninë e tyre.
Ngjarja vjen në një moment marrëdhëniesh herë pas here të tensionuara mes Meksikës dhe SHBA-ve për një sërë çështjesh, përfshirë luftën kundër narkotikëve.
Sheinbaum është përballur me presion në rritje nga presidenti amerikan Donald Trump për të goditur trafikun e drogës, por ka refuzuar vazhdimisht ofertat për operacione kundër narkotikëve të drejtuara nga SHBA në territorin e saj.
Ajo ka qenë e prerë se zyrtarët e huaj mund të operojnë në tokën meksikane vetëm nëse marrin miratim paraprak nga qeveria federale, duke këmbëngulur që sovraniteti i vendit nuk duhet të cenohet.
Ministria e sigurisë në Meksikë tha të shtunën se të dhënat e emigracionit tregojnë se njëri prej agjentëve kishte hyrë në vend si “vizitor”, ndërsa tjetri kishte udhëtuar me pasaportë diplomatike.
“Asnjëri prej tyre nuk kishte akreditim formal për të marrë pjesë në aktivitete operacionale brenda territorit kombëtar”, thuhet në deklaratë, duke theksuar se ligji meksikan ndalon agjentët e huaj të marrin pjesë në operacione pa miratim federal.
