Vdes nga kanceri gruaja që u bë simboli i 11 shtatorit
14 vjet më parë, fotoja e saj në media u bë simbol i tragjedisë së 11 shtatorit në SHBA. E cilësuar atëherë si “gruaja e pluhurosur” (Dust Lady), Marcy Borders ka ndërruar jetë ditët e fundit.
Afroamerikanja Marcy Borders ka vdekur pak ditë më parë si pasojë e kancerit në stomak. Sëmundja e rëndë mendohet se është pasojë e tragjedisë së atëhershme, që i mbushi trupin me toksina.
“Nëna ime ka bërë një betejë të jashtëzakonshme. Nuk është thjesht Dust Lady, është një heroinë që do të kujtohet gjithnjë”, është shprehur i biri.
Fotoja që bëri xhiron e botës në pak orë është realizuar në 11 shtator 2001 në rrugët e Manhatanit, pak momente pas shembjes së dy kullave binjake si pasojë e sulmit terrorist të Al Kaedës.
Marcy Borders, nga Bayonne në New Jersey, sapo kishte filluar punë në Bankën e Amerikës, kur ndodhi sulmi terrorist që u mori jetën 6 mijë personave. Kur kulla në të cilën punonte u godit nga avioni i marrë peng, Marcy nuk iu bind urdhrave të eprorëve dhe doli jashtë, duke shpëtuar.
