Çmimet e ushqimeve dhe pijeve joalkoolike në Shqipëri u rritën me 3.2% në korrik 2026, krahasuar me të njëjtin muaj të vitit të kaluar. Sipas të dhënave të Eurostat, rritja ishte rreth pesë herë më e lartë se në Bashkimin Europian, ku çmimet e ushqimeve u shtuan me vetëm 0.6%.
Presionet mbi çmimet kanë lëvizur në drejtime të kundërta. Në Shqipëri, inflacioni i ushqimeve u rrit nga 2.9% në qershor në 3.2% në korrik, ndërsa në BE u ngadalësua nga 1% në 0.6%.
Shqipëria renditet ndër vendet europiane me rritjen më të lartë të çmimeve të ushqimeve. Përpara saj janë Turqia me 37.6%, Rumania me 4.6%, Qipro me 4.5% dhe Islanda me 4.4%.
Ushqimet japin kontribut të rëndësishëm në inflacion
Inflacioni i përgjithshëm i harmonizuar në Shqipëri arriti në 3.4% në korrik, nga 3.2% një muaj më parë. Ushqimet dhe pijet joalkoolike kontribuuan me 1.09 pikë përqindje, duke përbërë rreth një të tretën e rritjes së përgjithshme të çmimeve.
Pesha e ushqimeve në shportën e konsumatorit shqiptar është gjithashtu e lartë. Sipas INSTAT, ato përbëjnë 34.46% të shportës së përdorur për llogaritjen e Indeksit të Harmonizuar të Çmimeve të Konsumit.
Në Ballkanin Perëndimor, Shqipëria kishte në korrik normën më të lartë të rritjes së çmimeve të ushqimeve. Pas saj renditej Kosova me 2.7% dhe Mali i Zi me 2.3%, ndërsa në Serbi dhe Maqedoninë e Veriut çmimet e ushqimeve shënuan rënie vjetore.
Ushqimet në Shqipëri mbi mesataren e BE-së
Përveç ritmit më të lartë të shtrenjtimit, Shqipëria po përballet edhe me një nivel të lartë të çmimeve të ushqimeve në raport me fuqinë blerëse.
Sipas të dhënave të Eurostat për vitin 2025, çmimet e ushqimeve në Shqipëri arritën në 102.9% të mesatares së BE-së, nga 99.6% një vit më parë.
Në të kundërt, të ardhurat për frymë në Shqipëri mbeten rreth 43% e mesatares së BE-së, ndërsa konsumi individual për frymë arrin në 48%.
Kjo diferencë mes nivelit të çmimeve dhe të ardhurave tregon presionin e lartë që shpenzimet për ushqime ushtrojnë mbi buxhetet familjare shqiptare, veçanërisht për shtresat me të ardhura të ulëta dhe të mesme.
