Aktorja amerikano-irlandeze Maureen O’Hara, një nga yjet e fundit e gjeneratës së artë të Hollywoodit, ka vdekur në moshën 95 vjeçare. Lajmin për vdekjen e saj e ka konfirmuar menaxheri i saj, Johnny Nicoletti. “Ajo ka vdekur në shtëpinë e saj në Boise, Idaho”, ka thënë Nicoletti, raporton BBC. O’Hara është e njohur për rolin e saj në filmin “How Green Was My Valley”, që në vitin 1941 kishte fituar disa çmime Oscar. Ajo gjithashtu kishte luajtur në “Quiet Man”, përkrah John Wayne-it.
E lindur në Dublin, ajo kishte shkuar në vitin 1939 në Amerikë dhe më vonë ishte bërë shtetase e këtij vendi. “Në karakteret e saj ajo ishte shumë energjike dhe e patrembur , ashtu siç ishte në jetën e vërtetë. Ajo gjithashtu ishte një irlandeze krenare që e ka kaluar tërë jetën e saj duke ndarë me botën trashëgiminë dhe kulturën e mrekullueshme të Emerald Isle”, ka thënë familja e saj përmes një deklarate.
