Avokati i Popullit, Igli Totozani, shprehu ngrushëllimet për humbjen e jetës së një njeriu të pastrehë në Durrës, për shkak të të ftohtit.
“Kjo është një tragjedi njerëzore e paralajmëruar. Drejtuesit vendor nuk duhet të presin që të pastrehët apo të vobektit t’u zënë derën e zyrës, por të dalin vetë në terren së bashku me stafet e tyre, të identifikojnë qytetarët në nevojë dhe t’u ofrojnë atyre ndihmë dhe strehë”, shprehet Totozani.
Avokati i Popullit i bën thirrje edhe qytetarëve që të njoftojnë organet lokale dhe punonjësit e Policisë së Shtetit sa herë të shohin në rrugë njerëz të pastrehë, fëmijë apo të moshuar të braktisur. “Të gjithë duhet të kontribuojmë në mbrojtje të së drejtës së jetës”, thekson Avokati i Popullit, Igli Totozani. /a.m.
