Mino Raiola i njohur si “super agjenti”, pasi menaxhonte disa prej yjet e futbollit botëror ndërroi jetë këtë të shtunë pas disa problemeve shëndetësore.
54-vjeçari ishte një agjent i profilit të lartë. Erling Haaland, Paul Pogba, Zlatan Ibrahimovic, Marco Verratti, Matthijs de Ligt dhe Gianluigi Donnarumma përfaqësoheshin nga ai.
Është raportuar se Raiola fitoi deri në 20 milionë funte nga shitja prej 89 milionë funte e Pogba-s nga Juventus-i te Manchester United në vitin 2016.
Teksa vetëm pak muaj na ndajnë nga merkato verore, gjithçka ishte duke lëvizur për disa nga yjet që përfaqësonte Raiola. Me fokus te Haaland dhe Pogba.
Haaland kërkohet nga një pjesë e mirë e klubeve të mëdha evropiane si Real Madrid, Barcelona, Manchester City, Manchester United, PSG dhe Bayern Munich.
Deri më tani ishte Raiola që nuk kishte vendosur se ku do të shkonte klienti i tij. Ai u kërkonte klubeve shuma të mëdha, ndërkohë që negociatat vijonin. Tashmë kjo çështje pritet të marrë tjetër rrjedhë.
Pogba është në merkato përsëri. Ai përfundon kontratën me United në verë. Juventus, PSG dhe Real Madrid janë vënë në garë për transferimin e tij.
Gjithashtu Ibrahimovic përfundon kontratën me Milan-in. Ndërsa, Stefan de Vrij kërkon të largohet nga Inter-i në fund të këtij sezoni.
Situata e dy italianëve të PSG-së, Verratti dhe Donnarumma nuk është ende e qartë. Kjo pasi në media është raportuar se të dy dëshirojnë të largohen.
Ndarja nga jeta e Raiola-s nga shumëkush shikohet si fillimi i një “trazire” në tregun e transferimeve.
