Një prej zyrtarëve më të lartë të Vatikanit ka kritikuar Bashkimin Evropian, duke e akuzuar se zbaton standarde të dyfishta në respektimin e së drejtës ndërkombëtare, ku, sipas tij, interesat politike dhe ekonomike po mbizotërojnë mbi parimet universale.
Sipas raportimit të Politico, kardinali Victor Manuel Fernandez, prefekt i Dikasterit për Doktrinën e Fesë, i bëri këto deklarata gjatë hapjes së një takimi me dyer të mbyllura të thirrur nga Papa Leoni, ku kardinalë nga e gjithë bota po diskutojnë mbi luftën dhe rolin e Kishës Katolike përballë konflikteve moderne.
Gjatë fjalës së tij, Fernandez tha se shumë qeveri po i interpretojnë normat morale dhe juridike në funksion të interesave politike, duke braktisur standardet universale.
“Nëse një vend konsiderohet armik, ai dënohet si jodemokratik dhe përballet me sanksione. Por nëse është aleat, mungesa e lirisë së shprehjes, shkeljet e të drejtave të njeriut apo mungesa e demokracisë shpesh anashkalohen”, u shpreh kardinali.
Duke iu referuar Bashkimit Evropian, ai tha se blloku ka vendosur sanksione ndaj disa shteteve, ndërsa ka mbështetur financiarisht dhe ushtarakisht të tjera, pa reaguar në të njëjtën mënyrë ndaj konflikteve të tjera që, sipas tij, kanë sjellë pasoja edhe më të rënda për popullsinë civile.
“Këto kontradikta tregojnë se, në praktikë, vendimet diktohen nga interesat politike dhe ekonomike të rajoneve të ndryshme të botës. Nuk ekziston më një kornizë e qëndrueshme e së vërtetës dhe e vlerave”, deklaroi ai.
Fernandez kritikoi gjithashtu zgjerimin e konceptit të vetëmbrojtjes legjitime, duke përmendur Rusinë, Shtetet e Bashkuara dhe fuqi të tjera që, sipas tij, e kanë përdorur këtë argument për të justifikuar ndërhyrjet ushtarake, nga Ukraina deri në Lindjen e Mesme.
Ai paralajmëroi se edhe doktrina katolike e “luftës së drejtë” është përdorur në mënyrë të gabuar për të justifikuar konflikte të padrejta, duke kërkuar që ajo të interpretohet sa më ngushtë dhe duke hedhur poshtë konceptin e luftës parandaluese.
Sipas përmbledhjes së publikuar nga Vatikani pas diskutimeve, shumë prej kardinalëve pjesëmarrës u shprehën në favor të tejkalimit të doktrinës tradicionale të “luftës së drejtë”.
