Kreu i grupit parlamentar të LSI-së Petrit Vasili ka sqaruar takimin që ka patur këtë të hënë Meta dhe Rama në Kryeministri, fill pas bashkëbisedimit të kryeparlamentarit me liderin e opozitës Lulzim Basha.
Vasili tha se për pretendimin e PD-së në lidhje me reformën në drejtësi, atë që njihet si formula e “vendeve të rezervuara”, mund të gjendet një zgjidhje… por gjithmonë brenda kuadrit të Venecias, EURALIUS e Opdat.
Vasili është kujdesur që të mos tregohet i drejtpërdrejtë, por ka lënë të kuptohet se LSI mund të pranojë një zgjidhje brenda kësaj formule.
“…kemi shprehur dhe besimin që janë të gjitha mundësitë që në përputhje me opinionin final të Venecias si dhe me rekomandimet e EURALIUS dhe OPDAT, ekzistojnë të gjitha mundësitë për arritjen e konsensusit me opozitën… për të dhënë të gjitha mundësitë e zgjidhjes, meqenëse edhe koha nuk pret më… për të dhënë zgjidhjen e këtij pretedentimi të vetëm që ka opozita (Vendet e Rezervuara) dhe që pengon reformën.
Kemi të gjitha mundësitë për zgjidhjen e kësaj çështjeje. Thashë dhe njëherë, në gjithë takimin kishte të bënte me njohjen e këtij pretendimi… bindja është që ky pretendim i vetëm do të siguronte zgjidhjen… Brenda kornizës së Venecias t’i japim një zgjidhje kësa çështje.”- tha Vasili.
Vendet e rezervuara kanë të bëjnë me të drejtën e partive politike për të emëruar në krye të dy institucioneve të larta të drejtësisë (përgjegjëse për zgjedhjen e gjykatësve dhe prokurorëve) anëtarët e tyre.
Në takimin që Rama pati me Bashën, pikërisht ky model që kryeministri e refuzon, u BË dhe molla e sherrit për mosarritjen e akordit… një ngërç që ende sot mban pezull votimin e reformës në drejtësi, pasi opozita e ka një kusht të domosdoshëm këtë pikë./ java a.k
