Ushtria e Shteteve të Bashkuara të Amerikës dhe Forcat e Armatosura të Shqipërisë kanë zhvilluar një stërvitje të përbashkët ushtarake të fokusuar në operacionet ajrore me dronë të tipit “Puma”. Manovrat u zhvilluan në Zonën e Stërvitjes në Bizë.
Lajmi u bë i ditur përmes një njoftimi zyrtar nga Ambasada e SHBA-së në Tiranë. Sipas të dhënave të publikuara, qëllimi kryesor i kësaj stërvitjeje ishte rritja e kapaciteteve të ushtrisë shqiptare në operacionet e mbikëqyrjes territoriale dhe në mbledhjen e inteligjencës ushtarake.
Në deklaratën e saj për shtyp, përfaqësia diplomatike amerikane vlerësoi rëndësinë e këtyre manovrave dypalëshe.
“Ky bashkëpunim do të çojë përpara gatishmërinë në fushën e mbrojtjes dhe do të mbështesë interesat e përbashkëta strategjike për një të ardhme më të sigurt për qytetarët tanë,” thuhet në njoftimin zyrtar të Ambasadës.
