Kryebashkiaku i Durrësit, Vangjush Dako u është përgjigjur sërish akuzave të ministrit të Mjedisit nga radhët e LSI, Lefter Koka. Dako shprehet se nuk merrem me llafe, por me punë dhe se të gjithë ata që akuzojnë përgjigjen do ta marrin në 18 qershor.
“Unë nuk merrem me llafe dhe deklarata, por merrem me punët dhe problemet e qytetit.
Janë qytetarët që vlerësojnë punën dhe kontributin e gjithsecilit dhe që do të japin përgjigjen më të mirë në qershor. Ne jemi në shërbim të qytetarëve dhe u shërbejmë dhe do tu shërbejmë atyre për sa kohë kanë vendosur të na e besojnë neve.
Pavarësisht deklaratave qytetarët dinë të bëjnë diferencën dhe në fund të fundit ata duan pune dhe shërbime nga ne drejtuesve që na kanë besuar drejtimin e qytetit. Ne do ta vazhdojmë punën deri në momentin që qytetarët do të duan te jem unë në krye të bashkisë” deklaroi ai.
Ministri i LSI Lefter Koka pak ditë më parë në një emision televiziv u shpreh se Dako po e keqadministron pushtetin që i ka dhënë PS dhe LSI në Durrës, ndërsa e akuzoi edhe për përçaje në koalicion, pasi sipas tij u thotë strukturave të PS se armiku politik nuk është PD, por LSI.
