Kreu i PD Lulzim Basha dhe ish kryministri Berisha e kanë anashkaluar deputeten Rudina Hajdari, vajzen e liderit të Dhjetorit Azem Hajdari.
Gjithçka u justifikua për shkak të zhvillimeve intensive dhe akteve të dhunës, pavarësisht se deputetja e PD ka qenë kundër këtij skenari.
Rudina Hajdari përmes një statusi në rrjetet sociale thotë se dhuna thjesht sa dobëson kauzën e tyre.
Sipas Hajdarit çdo akt dhune është i papranueshëm dhe jo-legjitim.
Reagimi i plotë i Rudina Hajdarit:
Një protestë e sukseshme nuk duhet të ketë dhunë në asnjë rast.
Qytetarët e Shqipërisë kanë shumë të drejtë dhe arsye të protestojnë kundër keq-qeverisjes, kriminalitetit, abuzimit shtetëror, autoritarizmit, papunësisë, padrejtësisë, diskriminimit, mos-zhvillimit .. etj.
Por mënyra sesi ne protestojmë dhe qëndrimet që ne mbajmë janë tepër të rëndësishme.
Çdo akt dhune i ndërmarrë është i papranueshëm dhe jo-legjitim.
Heronjtë janë ata që distancohen nga dhuna dhe që përfaqësojë me dinjitet qytetarët, pjesa më e madhe e të cilëve janë kundër dhunës.
Dhuna nuk e forcon kauzën tonë të drejtë, përkundrazi ajo e dobëson atë dhe madje rrezikon misionin dhe objektivat opozitare e demokratike.
Sikurse studentët, edhe ne rast provokimesh, duhet të tregojmë lidership dhe të menaxhojmë me integritet, të bashkuar, të vendosur dhe paqësorë derisa copëzat e fundit të një qeverie të rënë të shkërmoqen deri në fund për të hapur rrugë një modeli evropian qeverisje.
