Trajnimi i bluzave të bardha ka nisur me seancën e parë e cila kishte për qëllim njohjen e defibrilatorit një pajisje ekzaminuese dhe dëshpëtuese, e cila është e vendosur në 20 autoambulanca në të gjithë vendin. Kjo pajisje mjekësore bën të mundur kryerjen e EKG-së, njohjen e infarktit të miokardit si dhe kryerjen e goditjes elektrike si dhe përdorimi i terapisë elektrike nëpërmjet këtij monitori në rastet e aritmive për pacientët me çrregullime kardiake.
Një risi tjetër është edhe ofrimi i ndihmës mjekësore që në momentin e parë të kontaktit të pacientit dhe jo më në spital ashtu sikurse ka ndodhur deri më tani. “Deri më tani ndihma mjekësore jepej vetëm në spital, duke filluar nga sot ajo do të jepet edhe në terren, do të jepet në shtëpi, do të jepet në rrugë, do të jepet aty ku ndodh ngjarja. Nga ana tjetër informacioni do të merret në kohë reale dhe do të koordinohet nga Qendra Kombëtare e Urgjencës dhe do të shpërndahet po në kohë të shpejtë në rrethin ku kërkohet ndihma e ekipit të urgjencës. Do të jetë autoambulanca e cila është më afër pacientit që do të shkojë direkt në vendin e ngjarjes”, ka pohuar mjeku Edison Ndreka.
Sipas tij, në bazë të përcaktimit të kodit të urgjencës do të vendoset se si do veprohet me ofrimin e shërbimit shëndetësor, në rastet kur ajo do të filloë të jepet që në terren apo do të ndiqen shkallët e tjera.
Riorganizimi i Shërbimit të Urgjencës Mjekësore ka sjellë edhe një rritje të numrit të personelit shëndetësor në të gjithë vendin, bazuar kjo në nevojat dhe kërkesat që ka pasur çdo qark. “Ndryshimet e bëra në sistemin e Urgjencës Mjekësore kanë sjellë një shtim të numrit të personelit sipas nevojave të paraqitura. Por duke plotësuar edhe hallkat e tjera që ka të nevojshme ky system, në tashmë kemi nisur trajnimin e ekipeve mjekësore pranë Qendrës së Trajnimeve të Urgjencës Kombëtare Mjekësore. Në këtë trajnim janë përfshirë shoferët e autoambulancave të cilët tani unë do I quaj personat e dhënies së ndihmës së parë, pasi ata janë në gjendje të bëjnë rianimacionin kardio-polmunar, të dinë si bëhen shtypjet e gjoksit, si bëhet frymëmarrja por të njohin edhe aparaturën e defibrilatorit. Pra, tashmë ata do të jenë pjesë e ekipit mjekësor për ofrimin e shërbimit”, ka pohuar Skënder Brataj, Drejtori i Urgjencës Kombëtare Mjekësore.
Sipas tij, e njëjta për gatitje duhet të jetë edhe për ekipet mjekësore që shërbejnë pranë urgjencave në spitale, pasi edhe ata përballen me të njëjtat raste kur pacienti transportohet nga familjarët e tyre. Por ku ndryshon sistemi i ri i Urgjencës Mjekësore në krahasim me atë që ka funksionuar deri më tani.
Sipas mjekëve kryesore është shtimi në numër i autoambulancave, kompletimi i tyre me medikamente dhe aparatura si dhe vendosja e defibrilatorëve multifunksionalë të cilët do të ndikojnë në përmirësimin e dhënies së shërbimit mjekësor. Po kështu risi tjetër është shpërndarja e autoambulancave në disa pika të ndryshme në mënyrë që ato të jenë sa më pranë rasteve të urgjencës dhe jo grumbullimi i tyre në një pikë të vetme siç ka qenë deri më sot.
Po kështu, trajnimi i ekipeve mjekësore për dhënien e ndihmës së parë është një tjetër risi. Deri dje, këto ekipe nuk ishin të trajnuara dhe specializuara për ofrimin e këtij shërbimi. Në javët e ardhshme pranë Qendrës Kombëtare të Urgjencës Mjekësore do të organizohen të tjera trajnime për personelin.
ma.me
