Presidentja Vjosa Osmadni deklaroi se Shtetet e Bashkuara nuk janë kundër hapjes së urës së Ibrit por kërkojnë që të ketë koordinim dhe një plan zbatimi të përbashkët, ashtu sikurse për çdo temë tjetër që lidhet me sigurinë.
Osmani u shpreh se hapja e urës së Ibrit për qarkullimin e mjeteve duhet të jetë një sukses i përhershëm dhe jo i momentit. Sipas saj ky është edhe qëllimi i aleatëve.
“Ura patjetër që duhet të hapet por ne duhet të sigurohemi që kur të hapet mbetet e hapur, e jo që kur të hapet nxit një prezencë shumë më të madhe të NATO-s në të, a është në interes të Kosovës që ne të shohim konflikt mes policisë sonë dhe ushtarit amerikan? Nuk besoj që ka shqiptar në këtë tokë që pajtohet me një gjë të tillë.”
Osmani u tregua më e ashpër me Bashkimin Evropian deklaratat e disa prej zyrtarëve i cilësoi raciste. Ajo tha se kundërshton fuqishëm që tema e hapjes së urës të diskutohet me Serbinë në Bruksel.
“Nuk ka çka pyetet Serbia për një urë brenda territorit të Republikës së Kosovës, dialog me Serbinë për këtë temë nuk do të duhej të pranonte askush, do të ishte kundër kushtetues dhe kundër sovranitetit të Republikës së Kosovës, por dialog me shpëtimtarët tanë, ajo jo vetëm që është e nevojshme dhe e domosdoshme por është në interesin tonë mbi të gjitha.”
Presidentja u shpreh se aleatët e shohin situatën në një pasqyrë me të gjerë duke thënë se nuk ka asgjë të jashtëzakonshme që të bëhet koordinimi me Shtetet e Bashkuara.
“Paqja dhe siguria në Kosovë nuk e afekton vetëm Kosovën, afekton paqen dhe sigurinë në suaza shumë më të gjera, e në veçanti në rastin tonë kur ne të gjithë e dimë historinë, e mbajmë në mend ‘99 nuk është para dy shekujsh është para dy dekadash e gjysmë, pra e mbajnë të gjithë në mend që sot e gëzojmë këtë paqe dhe siguri sepse kemi vepruar bashkë me aleatët.”
Këto deklarata Osmani i bëri pas vizitës që pati në Komunën e Vitisë ku u takua me kryetarin Sokol Haliti.
