Presidenti i Republikës, Ilir Meta priti sot me kërkesë të tyre një përfaqësi të banorëve të “Unazës së Re”, banesat dhe pronat e të cilëve preken nga projekti i segmentit rrugor “Mbikalimi i pallatit me shigjeta-Rrethrrotullimi i sheshit ‘Shqiponja’”.
Sipas njoftimit të zyrës së shtypit të Presidentit, gjatë kësaj dëgjese me qytetarët, ‘Meta u informua në detaje, në lidhje me të gjitha shqetësimet dhe problematikat e këtij komuniteti që ende nuk janë zgjidhur nga institucionet përkatëse’.
Presidenti Meta theksoi se e ka ndjekur me shumë shqetësim dhe vëmendje maksimale situatën, si dhe ka kërkuar prej kohësh me insistim informacion zyrtar shterues nga të gjitha instancat shtetërore përgjegjëse për këtë çështje.
Në mbyllje të takimit, Presidenca thekson se Meta u garantoi banorëve të “Unazës së Re” se së shpejti do të mbajë një qëndrim të qartë zyrtar, për të gjetur një zgjidhje të shpejtë në përputhje me kornizën kushtetuese e ligjore, si dhe në interesin më të mirë publik e qytetar.
Një grup banorësh te Unaza e Re që preken nga projekti, por që banesat nuk i kanë me leje protestojnë prej më shumë se dy muajsh, pasi kërkojnë dëmshpërblim të plotë si pjesa tjetër. Por qeveria dhe bashkia u kanë garantuar bonus qiraje.
/a.meta
