Qeveria është tërhequr nga ndryshimet e propozuara prej saj në lidhje me masën e dënimit për kuponin tatimor. Deputetët e mazhorancës në komisionin parlamentar të ligjeve kanë vendosur që të heqin dorë nga dënimi me 3 vite burg për moslëshimin e kuponit tatimor, duke e ndryshuar këtë të fundit në 1 vit burgim. Me ndryshimet e reja dënimi do të jetë nga gjoba deri në 1 vit burg për mosdhënien e kuponit tatimor.
Pas përfundimit të mbledhjes grupit në PS, kreu i komisionit të Ligjeve Fatmir Xhafaj tha se ndryshimet u bënë pas konsultimeve me grupet e interesit dhe se me ndryshimet në draftin e ri edhe opozita është dakort.
“Ligji është konsultuar me grupet e interesit. Ky ligj ka ngrënë disa seanca në parlamentin shqiptar. I është nënshtruar një debati të gjerë dhe përfundimisht është bërë një ndryshim që ne na duket i arsyeshëm, ndryshim që e mbështeti edhe opozita edhe grupet e interesit”, deklaroi Xhafaj.
Përsa i përket ligjit për kriminalizimin e shpifjes, Xhafaj tha se do të flasë për të në momentin që shkon në komision, pasi tashmë është tërhequr nga qeveria
“Po sqaroj, një ligj që nuk ka ardhur në proces shqyrtimi, cili mund të jetë mendimi im? Qeveria ka thënë që e tërheq, do e sjellë apo nuk do e sjellë nuk e dimë. Kur të vijë do e shqyrtojmë. Si dëshironi ju ta bëj ligjin, se jeni grup interesi, ju kam thirrur edhe ju. Ju këshilloj të flisni për gjëra që i njihni. Projektligji kur të vijë, do shqyrtohet, do jap mendimin tim”, deklaroi Xhafaj.
Ndryshime u bënë po ashtu edhe në kodin e Punës, në lidhje me rkthimin në punë të punonjësve të larguar që kanë fituar gjyqin në Gjykatë për rikthimin e tyre. Sipas draftit të qeverisë, ai qytetar që fitonte të drejtën e rikthimit në punë përmes gjykatës mund edhe të mos punësohej në kushtet e plotësimit të vendeve, por amendamenti u kundërshtua nga opozita dhe në mbledhjen e sotme të komisionit të ligjeve u tërhoq dhe ky draft i qeverisë, duke lënë në fuqi ligjin aktual në kodin e punës. Sipas këtij të fundit, ai person që fiton përmes gjykatës të drejtën e rikthimit në punë do të punësohet në vendin ku ka qenë më parë.
