Ulet interesi i kredive për bizneset por edhe për qytetarët.Të dhënat e Bankës së Shqipërisë tregojnë se lehtësimi i politikës monetare ka dhënë efekte duke e bërë më të lirë kredinë për ekonominë në fund të vitit që lamë pas. Një trend i tillë prite të forcohet edhe më tej pasi Banka E Shqipërisë pritet të marë vendime për ulje të mëtejshme të normës bazë e nxitur kjo nga një inflacion i ulët.
Në raportin e politikës monetare theksohet se segmenti i individëve spikat për konkurrencën e lartë mes bankave dhe ofrimin e kushteve më të lehtësuara të kreditimit, çka është reflektuar në rënie më të shpejtë të interesave krahasuar me bizneset.
Interesi i kredisë hipotekare për individë në tremujorin e katërt rezultoi 3.7%.Ndërsa interesi mesatar për kredinë e re në Lek dhënë biznesit në këtë tremujor rezultoi 6.4%, nga 6.8% që ishte në fillim të vitit.
Analiza e interesit të kredisë sipas shumës së lëvruar evidenton rënie të interesave në të dyja kategoritë. Kreditë me shumë deri në 35 mln lekë janë lëvruar me një normë interesi mesatare prej 7.4%, ose 0.2 % më të ulët nga një tremujor më parë.
Por ulja e normave të interesit është reflektuar edhe te depozitat, si në Lek, ashtu edhe në Euro. Interesi mesatar i depozitave në Lek rezultoi 1.9%, nga 2.2% që ishte në fillim të vitit. Në mënyrë të ngjashme, edhe interesi mesatar për depozitat në Euro ka rënë në 1.1% në tremujorin e katërt, nga mesatarisht 1.4% që ishte në dy tremujorët paraardhës. Diferenca mes interesave të depozitave në Lek dhe atyre në Euro mbetet pozitive dhe e qëndrueshme./
