“Ukraina të njohë Kosovën, tani po e provon vetë çfarë është agresioni i pushtuesit”

Ish-ministri i Jashtëm, Paskal Milo, e cilëson të drejtë kërkesën e kryeministrit Rama drejtuar Ukrainës për njohjen e pavarësisë së Kosovës. Në studion e lajmeve të MCN TV, Milo tha se në situatën në të cilën ndodhet Ukraina po e provon vetë se çfarë do të thotë agresion nga një vend tjetër.

Ukraina duhet ta bëjë një hap të tillë. Sepse është duke e provuar vetë se ç’do të thotë agresion dhe segregacion i ukrainasve nga një pushtues tjetër. Pavarësisht se mund të ketë një problematikë të tillë, Putin e ka përmendur shpesh Kosovën, duke e sjellë si shembull. Unë e kuptoj që nuk i duhen dhënë Putinit argumente për të legjitimuar pushtimin e Krimesë. Do të ishte akt shumë i logjikshëm që Ukraina në këto momente të njihte Kosovën. Ka një diferencë të madhe dhe ndodhet në rrethanat që Putini nuk tërhiqet nga objektivat e veta. Kërkesa e Ramës është e drejtë sepse edhe vetë Kosova po e mbështet Ukrainën në këtë luftë.

Milo tha më tej se për shkak të interesave në lojë, lufta në lindje të Europës do të zgjasë.

Thirrja e Putinit ndaj tre liderëve europianë që ishin sot në Ukrainë është një thirrje që niset nga interesat e Rusisë që kërkon të realizojë objektivat e saj të vjetra. Tërheqja e Ukrainës në këto momente kur një pjesë e mirë e saj është e pushtuar nga Rusia nuk është zgjidhje realiste. Unë mendoj që kjo luftë që ka nisur siç e kanë parashikuar edhe shumë të tjerë do të zgjasë, sepse janë përplasje interesash të panegociueshme. Nëse Rusia tërhiqet, atëherë duhet të pranojë disfatën. Interesat janë të papajtueshme përsa kohë palët qëndrojnë në të njëjtat pozicione.

Ndërsa premtimin e kryeministrit Rama për ndërtimin e një lagjeje në Ukrainë, Milo e cilësoi një fjalë të dhënë që duhet mbajtur.

Ato ishin deklarata solidariteti. Gjëja më minimale është të mbështetet Ukraina dhe Zelensky në këtë rezistencë. Nëse ka edhe kontribute të karakterit financiar në përputhje me fuqinë që ka Shqipëria, është gjë e mirë. Derisa kryeministri i Shqipërisë e ka deklaruar, do ta bëjë. Çdo hap që hidhet matet me xhepin. Mirë është të bëhet.

/a.r