Mediat ukrainase raportojnë për dy ndeshjet kualifikuese për Botërorin 2018, Kosovë-Ukrainë. Ministria e Punëve të Jashtme të Ukrainës në një letër dërguar mediave ka bërë të ditur se ajo do të veprojë si shtetet e tjera që nuk e kanë njohur Kosovën, transmeton Koha.net.
“Duke pasur parasysh situatën që mbizotëron sot, në veçanti përfshirja e Kosovës në organizata të rëndësishme ndërkombëtare të sportit, që gjithashtu bashkëpunojnë me Ukrainën, dhe fakti se Kosova është e njohur tashmë nga shumica e vendeve (111), Ministria e Punëve të Jashtme e Ukrainës do të marrë parasysh praktikën e shteteve të tjera, të cilat nuk i njohin republikat e vetëshpallura”, ka thënë Ministria e Jashtme ukrainase, raportojnë mediat.
Më tutje thuhet se qëndrimi i Ukrainës për Kosovën mbetet i pandryshuar, dhe se nuk e njeh pavarësinë e saj.
Federata e Futbollit të Ukrainës ka thënë se, “ndeshja kundër ekipit kombëtar të Kosovës mund të zhvillohet në stadiumin e ‘Chernomorets’ në Odessa, me kusht që Ministria e Jashtme të zhvillojë një urdhër të veçantë për pranimin e delegacionit të sportit të Kosovës”.
Kosova është në Grupin I së bashku me Turqinë, Kroacinë, Ukrainën, Finlandën dhe Islandën. (b.an)
