Ndërmarrja e Ujësjellës-Kanalizimeve Tiranë ka nisur aksionin për ndërprerjen e të gjitha lidhjeve të paligjshme në rrjetin e furnizimit me uji të pijshëm në gjithë Njësinë Administrative Dajt. Nëpërmjet një njoftimi për mediat, UKT ka njoftuar se pas denoncimeve të shumta të banorëve në njësinë administrative Dajt, është bërë verifikimi nga ku rezultuan shumë ndërhyrje të paligjshme në tubin kryesor që furnizon qytetin e Tiranës dhe tek tubat që furnizojnë depot kryesore të Dajtit.
Si rezultat i këtyre evidentimeve të bëra nga stafi i UKT, Drejtoria Rajonale dhe grupi i Task Force, është bërë një plan pune për të ndërhyrë në të gjitha pikat ku janë bërë këto lidhje të paligjshme. Ky plan masash i ndërmarrë nga UKT, ka për qëllim përmirësimin e furnizimit me ujë të pijshëm në zonën e Dajtit, sidomos në zonën Qesarak, pasi për shkak të lidhjeve të paligjshme nuk bëhet i mundur furnizimi me ujë, duke qenë se banorët e përdorin ujin e marrë për vaditje.
Ndërhyrja e parë ka filluar në zonën e Kodër Linzës, ku aktualisht janë bërë 12 prerje të paligjshme në linjën që furnizon depon e Lazaretit. E njëjta punë do të vazhdojë në të gjitha njësitë administrative ku ka ndërhyrje të paligjshme në rrjet. Pas aksionit në zonën e Dajtit, UKT do të vijojë me evidentimin e problemeve në Kashar. (javanews.al / a.r)
