Pas zgjedhjes së tij si Avokat i Popullit në seancën maratonë të mbrëmjes së enjtes, ka reaguar Endrit Shabani.
Në një postim të gjatë të publikuar në rrjetet sociale, Shabani shprehet i surprizuar jo vetëm për faktin që u zgjodh ai në këtë pozicizion të rëndësishëm, por edhe për kundërshtitë që mori nga opozita, pavarësisht firmave që i kishin dhënë.
“Mbrëmë mora për kandidaturën time si Avokat i Popullit një votëbesim sa të rëndësishëm dhe personalisht prekës, aq edhe surprizues për nga dinamika e zhvillimit në sallën e Kuvendit.
Mbetem akoma i befasuar me deputetët e opozitës, të cilët fillimisht më inkurajuan me dashamirësi, më dhanë firmat e tyre sipas ligjit dhe më uruan sukses, por më pas vendosën ta braktisnin kandidaturën time a thua se nuk ishte e tyrja.
Nga ana tjetër, deputetët e mazhorancës, fillimisht refuzuan të më jepnin qoftë edhe një firmë, megjithëse disa prej tyre i kam miq, me argumentin se PS nuk do të hynte në këtë punë të opozitës, por në momentin final më votuan që të gjithë, madje me votë të fshehtë, duke më besuar detyrën e Avokatit të Popullit.
E gjithë kjo dinamikë ishte diçka që s’do ta besoja dot po të ma tregonin më parë dhe nuk e lija dot pa e shënuar.”, shkruan Shabani.
Ai shton se pavarësisht të gjithave, i falënderon deputetët e opozitës për firmat e tyre pa të cilat nuk do të mund të kishte kandiduar dhe deputetët e mazhorancës për votimin e tyre final. Shabani shton në fund: “U shpreh respekt për nivelin dallueshëm më të lartë politik dhe i siguroj se në kryerjen e kësaj detyre të rëndësishme do të bëj më të mirën për të gëzuar respektin e të gjithëve.”
Shabani u votua me 85 vota pro, pa asnjë abstenim dhe me vetëm 3 vota kundër, në një seancë ku vendet e deputetëve të opozitës mbetën bosh, pasi ata u larguan para fillimit të votimit.
Vendimi u mor në një klimë të tensionuar politike, pasi Partia Demokratike ndryshoi disa herë qëndrimet e saj për këtë proces.
Në ditët e mëparshme, PD-ja kishte firmosur në mbështetje të gjashtë kandidaturave që garonin për detyrën e Avokatit të Popullit. Megjithatë, më pas demokratët deklaruan tërheqjen e nënshkrimeve dhe kërkuan në seancë që procedura të shtyhej dhe pika e rendit të ditës të hiqej.
Argumenti i tyre ishte se procesi nuk kishte pasur konsensus politik dhe se mazhoranca po e çonte përpara në mënyrë të njëanshme. Debati vazhdoi për disa orë, deri kur opozita vendosi të largohej nga salla, duke bojkotuar fazën e votimit.
Ndërkohë, mazhoranca socialiste ka mbështetur thuajse plotësisht kandidaturën e Shabanit. Me këtë votim mbyllet periudha trevjeçare e zgjatur e ushtrimit të detyrës nga Erinda Ballanca, e cila qëndroi në krye të institucionit përtej mandatit zyrtar, për shkak të mungesës së marrëveshjes mes palëve politike.
