Policia e Gjirokastrës ka arrestuar një të kërkuar, Lavdimir Ajçe, 64 vjeç, i dënuar me 25 vjet burg për vrasje. Ajçe e ka kryer krimin më 1999, kur ka vrarë një polic në Bilisht. Ai fshihej në Lazarat, ku edhe është arrestuar, raporton BalkanWeb.
Personi i shpallur në kërkim ishte punësuar si bari tek një shtetas nga Lazarati, ndërsa prej 4 muajsh strehohej në stanin që ndodhej në vendin e quajtur Pesjak në fushat e fshatit Asim Zeneli. Burimet policore konfirmojnë faktin se ardhja e tij në Gjirokastër ka qenë pikërisht për t’u shpëtuar uniformave blu pas shpalljes në kërkim nga policia, ndërsa prej 16 vitesh ky person ka qenë në arrati të vazhdueshme.
Gjatë kohës që Lavdimir Ajçe ka jetuar në Sarandë është ndaluar disa herë prej policisë lokale, por pa mundur të identifikohet si person në kërkim, ndërsa po kaq i vështirë ka qenë identifikimi i tij edhe prej policisë së Gjirokastrës, që ka mundur të kryejë identifikimin e personit me anë të fotografive dhe syve të pandryshueshëm në foto, kundrejt pamjes totale fizike, krejtësisht të ndryshuar.
Deri në qershorin e vitit 2014, kur Policia e Shtetit ndërmori të parin superaksion policor në Lazarat, fshati i shumëpërfolur ka qenë prej vitesh bazë e elementeve kriminalë. Prania e tyre në fshat ishte kthyer në problem edhe për vetë banorët që deklaronin se në rrugët e fshatit shkëmbeheshin me persona të panjohur. Shtëpi të marra me qira ishin kthyer në kapanone ku strehoheshin 20 apo 30 persona, mes të cilëve edhe shumë punëtorë të hashashit. Gjatë superoperacionit të qershorit 2014 disa prej tyre u kapën nga policia, ndërsa një pjesë e mirë e të kërkuarve nga ligji arritën të largohen sërish.
