Pretendon se është mjekuar gabim në të dy sytë nga mjekët e spitalit francez, njëherazi dhe të një klinike private, ka vendosur ta ndjekë çështjen në rrugë gjyqësore. Pak ditë më parë, Kujtim Gj. ka hedhur në gjyq tre mjekë, duke kërkuar dëmshpërblim nga ana e tyre për dëmet që pretendon se i kanë shkaktuar nga keqmjekimi. Konkretisht, Kujtim Gj. ka paditur mjekun A.L., ish-shef pavioni në spitalin francez; A.G., mjeke në spitalin francez dhe në klinikë private si dhe V.M., punonjëse në spital francez. Ai kërkon nga gjykata të detyrojë të paditurit që ta dëmshpërblejnë në para, në të kundërt t’u heqë të drejtën e ushtrimit të profesionit. Padia mban nr. 13485 dhe do të shqyrtohet nga gjykatës Astrit Faqolli, i cili pasi të dëgjojë pretendimet e palëve, të marrë mendimin e specialistëve të fushës, do të vendosë nëse paditësi ka të drejtë dhe nëse duhet dëmshpërblyer.
Dëmshpërblimi
Ashtu sikurse dhjetëra pacientë, edhe Kujtim Gj. është drejtuar në spitalin francez, për problemet që kishte me dy sytë. Por, teksa shpresonte se do të bëhej më mirë, ai pretendon se është mjekuar në mënyrë të gabuar nga mjekët, të cilët i kanë shkaktuar dëm të rëndë. Në këto kushte, ai ka vendosur që në rrugë gjyqësore të kërkojë dëmshpërblim nga bluzat e bardha. Sikurse thuhet në padi, për dëmtimet që ka pësuar në syrin e djathtë, ai bën përgjegjës mjekët A.T. dhe V.M., ndërsa për dëmtimet e pësuara në syrin e majtë, kërkon dëmshpërblim nga mjekja A.G.. Në fakt, ai e ka lënë në çmim të gjykatës shumën e dëmshpërblimit për dëmtimet që pretendon se i janë shkaktuar nga keqmjekimi në sy.
Përfitimi si qëllim
Në padinë e Kujtim Gj. bie në sy fakti se veç të tjerash, ai e konsideron si të qëllimshëm keqmjekimin që i është bërë nga bluzat e bardha, madje thekson se një gjë të tillë ata a e kanë bërë për qëllime përfitimi. “Këto keqmjekime janë bërë me qëllim fitimi. Nëse mjekët nuk më dëmshpërblejnë dëmin, t’u hiqet e drejta e ushtrimit të profesionit si mjekë, pasi e kanë të përsëritur si ves të ulët fitimin”, shprehet ndër të tjera pacienti në padinë e tij. Procesi pritet të nisë brenda pak ditësh dhe gjykata në këtë rast medoemos duhet të caktojë ekspertë të fushës që të përcaktojnë nëse pacientit i është shkaktuar dëm nga mjekët dhe nëse po, cila është shuma që duhet të përfitojë si dëmshpërblim.
/BalkanWeb/
