Ministrja e Shëndetësisë dhe Mbrojtjes Sociale Ogerta Manastirliu dhe deputeti Taulant Balla vizituan sot Deanin, fëmijën 18 muajsh që u shpëtua dje nga ekipi i mjekëve dhe Njësia e Helikoptereve nëfshatin Qarrishtë të Librazhdit. Deani është jashtë rrezikut dhe po trajtohet në Pediatrinë e QSUT-së.
Mjekët konfirmojnë se gjendja e fëmijës është përmirësuar dhe po merr trajtimin e nevojshëm në spital.
Një ditë më parë, mjeket dhe stafi i Njësisë së Helikopterëve të Ministrisë së Shëndetësisë dhe Mbrojtjes Sociale në një mision shpëtimi në fshatin Qarrishtë të Librazhdit ja dolën të shpëtonin Deanin, vetëm 18 muajsh, i cili prej 3 ditësh kishte temperaturë të lartë dhe vështirësi në frymëmarrje. Në pamundësi për t’u transportuar me autoambulancë për shkak të dëborës, ekipi i mjekëve dhe Njësia e Helikopterëve arritën të shpëtonin Deonin në fshatin e thellë të Librazhdit, duke e dërguar në Pediatrinë e QSUT-së.
Ministrja Manastirliu falenderoi ekipet e mjekëve dhe infermiereve në të gjithë vendin, posaçërisht ekipet e urgjencave mjekësore, të cilët kryen disa misione shpëtimi në kushte të motit ekstrem.
Ministrja e Shëndetësisë dhe Mbrojtjes Sociale u ndal dhe në Urgjencën e QSUT-se ku deklaroi se brenda javës që vjen do të zhvillohet konkursi për mjekë të urgjencës, që do t’i bashkohen ekipit aktual të mjekëve në urgjencën qendrore.
Sipas Manastirliut, edhe programet e patronazhit dhe bonusit po ndikojnë drejtpërdrejt në uljen e fluksit në QSUT dhe po mundësojnë ofrimin e shërbimit të specializuar afër vendbanimeve të qytetarëve.
