Gjatë “Marshit për Liri” në Prishtinë, në mbështetje të ish-krerëve të UÇK-së që po përballen me procesin gjyqësor në Hagë, ka mbajtur fjalën e saj edhe Lirjona Sylejmani, vajza e dëshmorit Bajram Sylejmani.
Në fjalimin e saj, ajo foli për dhimbjen e rritjes pa të atin, por edhe për krenarinë që familja e saj i ka dhënë Kosovës dy dëshmorë. Sylejmani kërkoi drejtësi për çlirimtarët dhe bëri thirrje për bashkim, duke theksuar se interesi i atdheut duhet të jetë mbi çdo interes personal apo partiak.
“Unë, çika e Bajramit u rrita me një mungesë që nuk u plotësua kurrë. U rrita me mungesën e babait. Krahas dhimbjes u rrita me krenarinë se familja ime i dha vendit dy heronj, babin dhe xhaxhain. Sot po gjykohet pjesa më e ndjeshme e historisë, sot po tentohet të ndryshohet e vërteta, ani pse ne nuk kemi sulmuam askënd, ani pse ne nuk dhunuam gra e fëmijë, ani pse ne luftuam agresorin që synonte asgjësimin e popullit shqiptar. Unë dua drejtësi për çlirimtarët. Prandaj sot në këtë vend ku figura e Skënderbeut na sheh në këtë shesh them se Kosova nuk ka nevojë për më shumë mure mes nesh, ka nevojë për një urë që na bën të kuptojmë se interesi për atdheun duhet të kalojë cdo interes personal e partiak”, tha e bija e dëshmorit Bajram Sylejmani.
