Nga verifikimi i listave të kandidatëve të partive për zgjedhjet e 18 Qershorit kanë dalë edhe emrat e disa kandidatëve që kanë pasur probleme me ligjin apo janë hetuar në të shkuarën. Fillimisht, u bënë publik emrat e disa kandidatëve me probleme që janë në listat e subjekteve LIBRA, LSI, PDIU dhe disa parti të tjera të vogla.
Gjatë ditës së sotme qarkulloi në media edhe lista me disa emra të Partisë Socialiste që në formularët e vetëdeklarimit kanë pasqyruar problemet në të shkuarën. Mes emrave që qarkulloi në media ishte edhe kandidati socialist i renditur i 4-i në qarkun e Fierit, Ismet Beqiraj. Në formularin e kandidatit Beqiraj pasqyroheshin 2 shoqërime të tij nga policia në vitet 1996 dhe 1997. Në të dyja rastet nuk u fillua procedim penal siç shihet edhe në formular.
Në lidhje me këto të dhëna nga e shkuara, ka reaguar vetë kandidati socialist. Në një prononcim për JavaNews, Beqiraj deklaron se u “shoqërua nga policia në kohën kur së bashku me socialistët mallakastriotë u angazhua për ruajtjen e votës dhe demokracisë” siç thotë ai.
“Jam shoqëruar nga policia pasi po mbroja demokracinë. Jam shoqëruar për ngjarjet famëkeqe të 26 Majit 1996, dhe të 1997-ës. Jam dëshmitar i gjallë i represioneve të asaj kohe”, deklaron Beqiraj.
Referuar publikimit të këtyre të dhënave, ai shton se “Unë i kam deklaruar vetë në formular pse jam shoqëruar. Më bëjnë nder shumë të madh kush i publikon”./JavaNews/a.m.
