Zjarri masiv që përfshiu Malin e Krujës është vënë plotësisht nën kontroll, ndërsa situata në terren paraqitet e qetë. Lajmi u bë i ditur nga ministri i Mbrojtjes, Ermal Nufi, përmes një postimi në rrjetin social Facebook, shoqëruar dhe me pamje. Sipas Nufit, zjarri është vendosur nën kontroll që prej orës 06:00 të mëngjesit, pas një nate të gjatë përballjeje me flakët dhe një operacioni të koordinuar nga të gjitha strukturat e angazhuara. Ai sqaroi se një vatër e mbetur në majë të malit po menaxhohet nga ajri, me mbështetjen e dy helikopterëve të Forcës Ajrore, teksa shtoi se pjesa tjetër e situatës në terren është e qetë.
Në operacion morën pjesë mbi 200 efektivë zjarrfikës dhe më shumë se 200 efektivë të Forcave të Armatosura, të cilët punuan pa ndërprerje gjatë gjithë natës në të gjithë perimetrin e zonës së prekur.
Ministri i Mbrojtjes thekson se angazhimi i forcave në terren bëri të mundur shmangien e një situate më të rëndë, pasi flakët rrezikonin të përhapeshin në drejtim të zonave të banuara.
Bilanci i deritanishëm është një godinë e shkrumbuar nga zjarri, konkretisht një magazinë në pronësi të një biznesi. Fatmirësisht, sipas ministrit Nufi, nuk ka persona të dëmtuar dhe asnjë banesë nuk është prekur nga flakët.
Postimi i plotë:
Zjarri në Krujë u dominua plotësisht! Që prej orës 06:00 të mëngjesit, është vendosur plotësisht nën kontroll, falë angazhimit të koordinuar të të gjitha strukturave operacionale. Një pjesë e mbetur në majë të malit po menaxhohet nga ajri me mbështetjen e dy helikopterëve të Forcës Ajrore.
Situata është krejtësisht e qetë dhe fatmirësisht një katastrofë e mundshme u parandalua falë angazhimit në terren të mbi 200 efektivëve zjarrfikës dhe mbi 200 efektivë të Forcave të Armatosura – të cilët kanë punuar pa ndërprerje gjatë gjithë natës në të gjithë perimetrin e zonës së prekur. Pjesa më e madhe e këtyre forcave tashmë janë rishpërndarë.
Vetëm një godinë rezulton e shkrumbuar nga zjarri (magazinë e një biznesi). Fatmirësisht, nuk ka asnjë jetë të cenuar dhe asnjë banesë të djegur.
Falënderim dhe mirënjohje pa kufij për përshkushtimin dhe sakrificën e veçantë të secilit prej efektivëve të forcave operacionale që luftuan në mënyrë të paepur për shuarjen e zjarrit masiv në Malin e Krujës.
