Prokuroria mbyll hetimet dhe kërkon 74 vjet burg për një grup trafikantësh ndërkombëtar të heroinës të cilët u arrestuan në prill të një viti më parë.
6 të pandehurit u kapën në flagrancë më 16.04.2014 pranë pikës së kalimit kufitar të Kapshticës teksa po tentonin të kalonin në drejtim të Greqisë rreth 2.6 kilogramë heroinë.
Ndaj këtyre persona, është zhvilluar hetimi proaktiv, i drejtuar nga Prokuroria për Krime të Rënda pak javë para arrestimit të tyre.
Në bazë të këtij hetimi, rezultoi se 6 të pandehurit banues në Elbasan dhe Peqin, si edhe disa persona të tjerë, ishin pjesë e një grupi që trafikonin lëndë narkotike nga Shqipëria në Greqi.
Lënda narkotike dyshohet se kishte mbërritur nga Maqedonia dhe do trafikohej drejt Greqisë. Në momentin e arrestimit, 6 personat kanë qenë duke udhëtuar me dy mjete, një furgon me targa të qytetit të Devollit, si dhe një mjet tjetër tip “Benz”.
Pavarësisht qëndrimit mohues të disa prej të pandehurve lidhur me veprat penale për të cilat akuzohen, Prokuroria për Krime të Rënda përmes një njoftimi për mediat bën me dije se ka siguruar provat e plota dhe kërkon si dënim për këta persona:
• Renato Shopi të dënohet me 14 vjet burgim
• Aleks Kreci të dënohet me 13 vjet burgim
• Shyqyri Hasalla të dënohet me 13 vjet burgim
• Ardian Shurdha të dënohet me 12 vjet burgim
• Eli Djali të dënohet me 11 vjet burgim
• Dritan Qesja të dënohet me 11 vjet burgim
Organi i akuzës bën me dije gjithashtu se Gjykata ka pranuar kërkesën e të pandehurve për gjykim të shkurtuar dhe, nëse shpallen fajtorë, të pandehurit do të përfitojnë uljen 1/3 e dënimit.
Ndërkohë, i bashkëpandehur me këta persona është edhe shtetasi Ervis Haskolli, i cili gjykohet më vete
