Gjykata e Tiranës ka vendosur masën e sigurisë “arrest në burg” për 8 persona të arrestuar dy ditë më parë, të dyshuar për përfshirje në një rrjet të trafikut të armëve.
Me kërkesë të Prokurorisë, trupa gjykuese miratoi vendosjen në paraburgim për shtetasit Emirel Tusha, Leandro Haxhiaj, Fabricio Berberi, Rikardo Hajdaraj, Visar Murati, Kevin Farruku, Geraldo Muraj, Adriano Shehu.
Të dyshuarit nuk kanë pranuar të japin shpjegime përpara trupit gjykues. Ndërkohë, mbrojtja ka kundërshtuar vendimin duke pretenduar se arrestimi është kryer në kundërshtim me ligjin dhe ka kërkuar që të konsiderohet i paligjshëm.
Avokatët kanë ngritur shqetësime për përdorimin e të ashtuquajturave “blerje të stimuluara”, duke pretenduar se policia ka provokuar të arrestuarit drejt veprimeve të kundërligjshme.
Një tjetër pikë e theksuar nga mbrojtja ishte kërkesa për akt-ekspertizën e armëve të sekuestruara, për të verifikuar nëse ato ishin apo jo funksionale.
Nga ana tjetër, Prokuroria ka dorëzuar në gjykatë ekspertiza të mëparshme që lidhen me armët e kapura gjatë ndalimit të shtetasve Altin Pajaziti dhe Kadri Prushi, ku rezulton se një prej armëve ka qenë jashtë funksioni.
Operacioni i zhvilluar nga strukturat e rendit çoi në sekuestrimin e një sasie të konsiderueshme armatimi dhe sende të tjera:
14 armë zjarri, përfshirë 12 pistoleta (një me silenciator) dhe 2 automatikë, 2077 fara kanabisi, Municion luftarak dhe krehra, 3 automjete, 8 telefona celularë.
Hetimet mbi këtë rrjet të dyshuar kriminal vijojnë, ndërsa autoritetet po punojnë për të zbardhur të gjithë skemën e trafikut të armëve dhe përfshirjen e personave të tjerë të mundshëm.
