Haxhi Giu, ish-prokurori i Krujës u dënua me 2 vite e 4 muaj burg nga Gjykata e Krimeve të Rënda për akuzën e “korrupsionit pasiv”.
Giu u kap duke marrë rryshfet 29 mijë euro nga një qytetar për një çështje penale. Ai u gjykua me procedurën e gjykimit të shkurtuar.
Prokurori Giu, dyshohet për korrupsion pasiv, ku, sipas Krimeve të Rënda ka pranuar nga shtetasi Aleks Shpori një shumë parash në këmbim të zbutjes së pozitave të Paulin Shporit, i arrestuar për trafik droge në vitin 2014. Një nga provat kryesore të akuzës për prokurorin mësohet se janë përgjimet telefonike. Regjistrimi i bisedave ka nisur për shtetasin Paulin Shpori, i arrestuar për trafik droge në vitin 2014. I burgosuri është përgjuar teksa fliste me vëllanë e tij, Aleks Shpori përmes të cilave zbulohet dhe implikimi i prokurorit në çështjen penale.
Në këto biseda mësohet se janë përmendur takimet e Aleks Shporit me prokurorin Haxhi Giu dhe pas negociatave ai i ka ofruar 29 mijë euro në këmbim të lehtësimit të akuzës për të vëllanë e arrestuar. Ata kanë shkuar në një pikë këmbimi valutor, ku Shpori ka depozituar një shumë parash prej 10 mijë eurosh, si “garanci” për shërbimin antiligjor që do t’i kryente prokurori. Pikërisht pamjet e kamerave të kësaj agjencie janë sekuestruar si provë nga prokuroria./a.m.
