Kreu i LVV-së, Albin Kurti, ka folur për mediat pas incidenteve në Kuvend, që çuan në ndërprerjen e seancës konstituive. Kurti deklaroi se ndonëse LVV i ka votat për të votuar një kryeparlamentar të ri, konstituimi i Kuvendit pa një marrëveshje që garanton edhe zgjedhjen e presidentit, çon detyrimisht në zgjedhje të reja.
“Insistimi ynë i drejtë është që të ulemi, të bisedojmë, të merremi dhe vetëm nga lartësia e një marrëveshjeje politike dhe nga gjerësia e një marrëveshje mes meje dhe liderët e partive të tjera parlamentare, të konstituojmë Kuvendin, Qeverinë dhe ta zgjedhim presidentin”, tha ai, pas seancës konstituive.
Ai u bëri thirrje partive të tjera politike që të takohen për të arritur një marrëveshje.
I pyetur për incidentin me deputeten e Aleancës, Time Kadriaj, që hodhi vezë në drejtim të tij, Kurti tha se nëse ky është çmimi që duhet të paguajë në mënyrë që udhëheqësit politikë të dialogojnë për të arritur një marrëveshje, ai pranon që ta paguajë një çmim të tillë.
“Edhe nëse bëhen aksione të tilla kundër meje, s’jam këtu për veten time, jam këtu për Republikën e Kosovës dhe kërkoj që edhe të tjerët të vijnë këtu dhe për Republikën të bëjmë marrëveshje. Nëse gjuajta me vezë dhe goditja e sakos dhe pantallonave të kryeministrit nga vezët që i hedh një deputete është çmimi që duhet ta paguaj në mënyrë që ata të ulen e të bisedojnë bashkë e të dialogojnë, jam i lumtur ta paguaj këtë çmim. Vetëm le të vijnë në takim. Vetëm le të ulen e bashkëbisedojnë. Unë nuk ankohem që ata hedhin vezë, ankohem që ata s’duan të takohen”, deklaroi ai.
