Ish-Kryeprokurori Adriatik Llalla u dënua me 2 vjet burg të enjten nga Gjykata për fshehje të pasurisë. Këtë të premte, Gjykata e Posaçme Kundër Korrupsionit ka publikuar pikërisht këtë vendim në të cilin jepen edhe detaje për 3 episodet ku Llalla nuk ka bërë deklarim të saktë të pasurisë dhe për të cilin edhe u dënua me burg.
Bëhet fjalë për deklarime të ndodhura në vitin 2017, në muajin Janar, Mars dhe Dhjetor. Për të treja këto raste, trupa gjykuese ka dhënë nga një vit burg për Llallën. Por në bazë të Kodit Penal, nga bashkimi i tyre në një të vetëm, dënimi përfundimtar është në 2 vjet.
Dënimin, që nis nga momenti që merr formën e prerë, pra kur Apeli të ketë thënë fjalën e tij, Llalla do ta kryejë në një burg të sigurisë së zakonshme.
GJKKO vendosi gjithashtu që Adriatik Llalla nuk mund të kryejë asnjë funksion publik për 5 vjet, si dhe sekuestrimin e disa pasurive të tij. Një apartament në Durrës dhe 4 sipërfaqe tokë të cilat konfiskohen dhe kalojnë në favor të shtetit.
Ish-Kryeprokurori ka të drejtë që ta ankimojë këtë vendim brenda 15 ditëve, duke nisur nga kjo e premte.
/a.r
