Ish-futbollisti i Kombëtares, Klodian Duro, u arrestua në datën 24 mars, nga policia e Tiranës, për shkak të përndjekjes ndaj ish-gruas.
Pas divorcit, ish-bashkëshortja e Duros kishte një urdhër mbrojtje, urdhër i cili u thye nga ish-mesfushori para pak ditëve dhe në këtë formë u arrestua.
Ndërkohë, ditën e sotme gjykata e rrethit të Tiranës ka dhënë edhe vendimin për 42-vjeçarin. Ai do të duhet të qëndrojë në arrest shtëpie, ndërkohë që kjo masë cilësohet si lehtësuese duke qenë se për veprime të tilla, masa është ajo e arrestit me burg.
Vendimi është marrë nga gjyqtari, Bedri Qori. Sakaq, secila nga palët do të ketë të drejtën e apelimit të këtij vendimi.
Ndërkohë avokati i tij tha në seancë se Duro ka vajtur në banesën e ish-bashkëshortes për të takuar vajzën.
“Ata janë në proces divorci dhe çështja ndodhet në Apel. Ish-bashkëshortja nuk e ka lejuar që të takojë vajzën. Më datë 21 vajza ka pasur ditëlindjen dhe ish-bashkëshortja nuk e ka lejuar”, ka thënë avokati Erjon Kullolli. Sipas tij, Duro i ka siguruar ushqime për vajzën e tij por nuk e ka takuar.
g.kosovari