Dalin detaje të reja për një nga dy personat e arrestuar për mashtrim gjatë operacionit të koduar “Juristët e rremë” në Tiranë.
Bëhet fjalë për 48-vjeçaren Miranda Fortuzi, me profesion mjeke, e cila rezulton e dënuar po për mashtrim.
Në vitin 2016, ajo u arrestua bashkë me Hysen Zenelin, për mashtrim dhe falsifikim dokumentash.
Asokohe Fortuzi është prezantuar si juriste në Kryeministri, duke premtuar zgjidhjen e një problemi pronësie pranë Agjencisë së Trajtimit të Pronave, për një sipërfaqe toke prej në këmbim të parave.
Sakaq gjatë operacionit të kësaj të enjteje, të dyshuarit prezantoheshin si juristë të një institucioni të rëndësishëm kushtetues shqiptar dhe premtonin në këmbim të një shume lekësh, dhënie lejeje zhvillimore e licencë, për ushtrim të aktivitetit të mësimdhënies.
Kështu të arrestuarit janë Miranda Fortuzi, 48 vjeçe, banuese në Tiranë e dënuar më parë për veprën penale të “Mashtrimit” dhe N. Sh., 24 vjeç, banues në Tiranë.
Ata akuzohen në bashkëpunim me njëri-tjetrin, duke u prezantuar si juristë të një institucioni të rëndësishëm kushtetues të Republikës së Shqipërisë, kanë mashtruar dy shtetas duke iu kërkuar një shumë të konsiderueshme lekësh, me qëllim për t’iu siguruar leje zhvillimore e licencë për ushtrimin e aktivitetit të mësimdhënies në një komunitet fetar.
Të dyshuarit janë kapur në flagrancë nga shërbimet e policisë këtë të enjte, në momentin që do të takoheshin për t’u kërkuar lekët dy personave të mashtruar.
Gjatë arrestimit të dyshuarit kanë bërë rezistencë dhe kanë kundërshtuar punonjësit e policisë.
Në cilësinë e provës materiale janë të ndaluarve ju sekuestrua një automjet, dy aparate celularë, si dhe dokumente të ndryshme.
Lidhur me aktivitetin e tyre hetimet janë në vijim, ndërkohë që materialet iu referuan Prokurorisë së Tiranës për veprat penale “Mashtrimi”, “Falsifikimi i dokumenteve”, “Përvetësimi i titujve apo i detyrës shtetërore”, “Goditja për shkak të detyrës” dhe “Kundërshtimi i punonjësit të Policisë”.
/a.rada
