Michael Reschke, njeriu që bën merkaton e Bayernit të Munihut, ka qenë në Napoli, për të ndjekur nga afër mbrojtësin e kombëtares shqiptare, Elseid Hysaj. Lajmin e ka bërë të ditur e përditshmja sportive Tuttosport dhe ajo napolitane Il Matino, të cilat shkruajnë se klubi gjerman është gati të bëjë një ofertë që shkon nga 18 në 20 milionë euro për Hysajn.
Futbollisti shkodran, i cilin është rritur te Empoli para se të kalonte në Napoli bashkë me trajnerin Sarri, shihet si zëvendësues i kapitenit Filipp Lahm dhe i brazilianit Rafinha, të dy mbi të 30-tat.
Gazetat shkruajnë se Napoli nuk do ta refuzonte kurrë një ofertë të tillë për Hysajn, të cilin e bleu 4 milionë euro nga Empoli, por agjenti i tij nuk nxitohet.
Mario Giuffredi, i pyetur nga Radio CRC për interesimin e skuadrës së ardhshme të Carlo Ancelottit, thotë: “Ai ka tërhequr vëmendjen e klubeve më të rëndësishëm, por që këtu deri në hapjen e bisedimeve ka shumë diferencë. Elseidi është i lumtur në Napoli dhe me skuadrën e kaltër, sidomos edhe me pjesëmarrjen në Champions League. pastaj, kuptohet që interesimi sjell kënaqësi, por Napoli u tregua i zoti kur besoi te Hysaj. Një vit më pas kanë ndryshuar shumë gjëra, ka rënë më tepër në sy dhe tashmë përbën siguri në skuadër”.
D. Ikonomi
