Iraku i kërkoi sot Turqisë të tërheqë menjëherë trupat nga territori i saj pas vendosjes së ushtarëve turq në rrethinat e Mosulit, sipas një komunikate zyrtare.
“Vendosja e trupave turq është konsideruar si një shkelje serioze e sovranitetit irakian”, shtoi komunikata e publikuar nga kryeministri Haider al-Abadi.
Autoritetet irakiane i kërkojnë Turqisë të tërhiqet menjëherë nga territori irakian.
Sipas agjencisë proqeveritare turke të lajmeve Anatolie, rreth 150 ushtarë turq kanë mbërritur dje në rrethinat e Mosulit, qyteti i dytë i Irakut i pushtuar nga grupi xhihadist i Shtetit Islamik, në kuadër të një misioni për trajnimin e trupave kurde irakiane.
“Ky kontigjent turk, mbështetur nga 20-20 tanke, u vendos në rajonin e Bashikas”, shtoi Anatolie.
Ushtarët turq janë të pranishëm që prej dy viteve e gjysmë në veri të Irakut në kuadër të një marrëveshjeje bashkëpunimi destinuar trajnimit të “peshmergasve”, trupat e rajonit autonom të Kurdistanit irakian.
